Top

Membru F-FDTL 14 hetan asidente iha Fatuahi, ida grave

Imajen facebook

DILI, 03 outubru 2023 (TATOLI) – Membru FALINTIL–Forsa Defeza Timor-Leste hosi komponente Navál Hera na’in-14 hetan asidente iha Fatuahi, Postu Administrativu Cristo-Rei, Munisípiu Díli bainhira hala’o ezersísiu ho karreta Haikon ida hosi Hera mai Díli.

Membru F-FDTL 14 hetan asidente iha área Fatuahi, maizumenus iha oras 9:30 dader ne’e, bainhira membru hirak ne’e ho karreta Haikon ida atu halo ezersísiu Fuzileiru hosi baze Navál Hera dirasaun atu mai Dili.

Maibé bainhira iha área Fatuahi nian, karreta Haikon ne’ebé forsa sira uza ne’e tanba travaun la han, nune’e mak karreta hetan asidente no rezulta membru F-FDTL 13 kanek kaman no na’in ida hetan kanek todan tanba hetan pankada makas iha ulun.

Xefe Departementu Emerjénsia Hospitál Nasionál Guido Valadares (HNGV), Eldegar Lopes Martins, hateten iha tuku 9:30 simu informasaun hosi Servisu Ambulánsia katak iha kolega sira hetan asidente karreta hosi Hera mai Díli, tanba envolve ema barak ona entaun parte HNGV liuliu Emerjénsia nian kompostu hosi ema doutór jerál no espesialista preparadu kedan hodi fó tratamentu.

“Iha asidente ne’e rezulta ema 14, hosi númeru ne’e, iha ema13 mak kondisaun kanek kaman no iha nain-ida mak kondisaun kanek grave tanba hetan pankada makas iha ulun”, Eldegar Lopes hateten ba jornalista sira iha HNGV Bidau, tersa ne’e.

Nia dehan, membru F-FDTL ne’ebé hetan pankada makas, doutór sira orienta ona hodi ba hasai X-Ray atu hatene kle’an kondisaun saúde, enkuantu sira membru 13 ne’ebé ho kondisaun kaman ne’e doutór sira halo ona tratamentu intensivu ba sira.

“Sira ne’ebé mak ohin kondisaun ladún grave agora doutór sira halo ona tratamentu, kuandu kondisaun estavél ona sira bele fila ona, maibé membru ida kondisaun gravé tanba hetan pankada makas iha parte ulun, entaun doutór sira orienta hodi ba hasai X-Ray”, nia informa.

Tuir obervasaun TATOLI iha terenu katak tratamentu ba membru militár sira-ne’e hetan akompañamentu hosi ofisiál F-FDTL na’in-lima hosi Komponetente Navál balun inklui forsa infantaria balun.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!