Konferénsia internasionál sei toka violasaun konstituisaun iha 11 outubru
DILI, 04 outubru 2023 (TATOLI) – Vise Ministru ba Fortalesimentu Insitusionál Paulo Manuel dos Remédios, hateten iha 11 outubru, sei realiza konferénsia internasionál hodi ko’alia kona-ba violasaun konstituisaun no erru judisiáriu.
“Fulan ne’e ita iha primeira konferénsia internasionál kona-ba violasaun konstituisaun no erru judisiáriu, erru tribunál tuir lei internasionál nian, ne’ebé profesór balun hosi Inglaterra, Portugal no Indonézia mak sei mai, atividade ne’e ita programadu ba 11 outubru agora”, Vise Ministru dehan ba Agência TATOLI iha Faról, foin lalais ne’e.
Iha konferénsia ne’e, oradór mai hosi hosi nasaun Inglaterra, Portugál no Indonezia no konferénsia ne’e sei iha kontinuasaun to’o dezembru.
“Ita hatene katak programa Governu ko’alia kona-ba reforma boot ba Justisa, ita hala’o konferénsia ne’e tanba dalabarak ita haree desizaun sira sai hosi Tribunál, ita haree balun la justu, kuandu desizaun la justu ne’e mak erru justisa, ita iha mekanizmu ka lae, entaun ita halo konferénsia atu simu informasaun hosi professór sira internasionál atu ba future, hahú 2024 ita bele hadia ona sistema Tribunál nian, sistema kódigu prosesu sivíl, sistema kódigu prosesu penál no seluk tan hodi hadia sistema Justisa”, nia revela.
Nia hatutan, dalabarak Tribunál foti desizaun la justu ba povu kiik sira liuliu kona-ba rai no halo povu barak sai vítima to’o ikus la hetan indeminizasaun.
Reforma totál ba setór Justisa
Governu planeia ona atu halo reforma ba setór Justisa globál ne’ebé la’os refere de’it ba área ida maibé hotuhotu.
“Aplikasaun reforma, ita presiza mak reforma globál no espesiál ba lei espesiál mak ita bele halo, reforma no sei halo duni iha futuru”, nia hakotu.
Jornalista: Hortencio Sanchez
Editór : Zezito Silva
