TL sei kontrata péritu internasionál reforsa ekipa ba reforma justisa

DILI, 04 outubru 2023 (TATOLI) – Xefe Ekipa traballu ba Reforma Justisa Lucia Lobato, dehan Governu sei kontrata péritu internasionál na’in-lima hodi reforsa servisu ekipa traballu ba reforma justisa iha Timor-Leste.
Nia dehan, orsamentu rekrutamentu ba péritu na’in-lima mai hosi Gabinete Primeiru-Ministru, tanba Governu Konstitusional servisu hamutuk ho Programa Nasaun Unida ba Dezenvolvimentu (PNUD) hodi halo kontratu ba péritu hirak ne’e.
Nia dehan, tempu badak nia-laran, Governu hamutuk ho PNUD sei anúnsia konkursu ba péritu internasionál hirak ne’e.
Antes ne’e, Governu asina ona nota entedimentu ho PNUD hodi fó biban ba PNUD atu halo rekrutamentu hodi kontrata péritu internasionál sira atu bele ajuda ekipa traballu hodi servisu di’ak iha reforma ba setór justisa tuir prioridade governativa.
“Péritu sira-ne’e nia servisu mak sei halo análize dignóstika ba situasaun iha setór justisa no sei enkamiña rezultadu sira ba ekipa traballu reforma ne’ebé liderdu hosi ha’u rasik atu ha’u bele aprezenta ba Primeiru-Ministru”, Lucia Lobato hateten ba jornalista sira bainhira halo enkontru ho Diretór Jerál PCIC, iha edifísiu PCIC Colmera, kuarta ne’e.
Nia dehan, péritu sira-ne’e sei halo nia servisu durante fulan lima ka péritu sira ne’e sei halo servisu iha prazu fulan marsu 2024.
“Ita-nia parte hahú prepara termu referénsia tanba ne’e, ha’u mai koalia ho autór judisiáriu sira hanesan PCIC, Tribunál, Ministériu Públiku husu sira nia hanoin sá termu referénsia mak ita bele fó ba péritu internasionál sira-ne’e molok aprezenta ba Primeiru-Ministru atu halo aprovasaun ba termu referénsia ne’e”, nia afirma.
“Sé kuadu relatóriu hosi péritu sira-ne’e mak dehan PCIC tenke ba kontinua formsaun tanba formasaun sei menus, entaun klaru katak sira tenke ba tuir formasaun, no proposta ne’e tenke ba Governu hodi haree, tanba reforma justisa nu’udar planu prioridade Governu nian”, nia realsa.
Tanba ne’e, nia husu ba mídia sira atu pasiénsia hodi akompaña ba servisu ekipa traballu kona-ba reforma justisa nian.
Lucia Lobato, hateten reforma ne’e la’os loron ida de’it ka fulan ida de’it, maibé presiza tempu.
“Reforma justisa ne’e ita labele halo ba loron ida de’it, fulan ida de’it, reforma atu sai di’ak tebes ne’e ho rezultadu di’ak, ita labele halo arbiru de’it”, nia dehan.
“Tanba ne’e, ha’u tenta ho másimu posivél hodi kuidadu tebtebes para uma vez kuandu relatóriu ne’e sai la’os Primeiru-Ministru mesak mak halo no la’os Lucia Lobato mesak mak halo maibé relatóriu ida-ne’e sei mai hosi péritu ne’ebé ita rekruta”, Lucia afirma.
Tuir nia, relatóriu diagnóstiku ba setór justisa sai baze ba Governu atu halo nusa maka hahú introdús refoma ba setór justisa”, nia subliña.
Lucia revela, reforma setór justisa ne’e importante tanba bele hadia setór balun justisa nian ne’ebé la’o seidauk di’ak hanesan iha tinan lima ka neen ona la kondis ho situasaun agora, tanba ne’e mak Governu hanoin hodi halo reforma.
“Reforma atu reforsa sistema judisiál, la’os reforma atu sobu sistema, ida-nee ita tenke hanoin pozitivu oituan iha área ida-ne’e”, nia revela.
Kona-ba estatutu PCIC, nia refere, nesesáriu duni atu hadia estatutu Polísia Sientífika Investigasaun Kriminál (PCIC, sigla portugés), tanba durante ne’e atuasaun PCIC hetan krítiku barak liuhosi públiku.
Jornalista: Natalino Costa
Editór : Zezito Silva

