DILI, 04 outubru 2023 (TATOLI) – Vise Ministru Fortalesimentu Insitusionál, Paulo Manuel dos Remédios, dehan sidadaun sira ne’ebé atu trata dokumentu passaporte mak lori de’it Billete Identidades (BI), la presiza lori dokumentu sira seluk.
“Hahú fulan outubru ne’e, sidadaun hotu ba trata dokumentu iha Ministériu Justisa sei fasilita sira kuandu iha ona kartaun billete identidade, la presiza iha tan kartaun eleitorál, la presiza tan iha sertidaun RDTL, kuandu atu ba trata passaporte uza dokumentu ida de’it, tenke uza de’it billete identidade, la presiza dokumentu barak, ida-ne’e mak ita tenke dijitaliza sistema, atu labele halo kole ema sira ba trata dokumentu hanesan passaporte”, Vise Ministru hateten ba Agência TATOLI, iha Faról, foin lalais ne’e.
Nia dehan, Governu ne’ebé lidera hosi Primeiru-Ministru Kay Rala Xanana Gusmão ho nia programa ne’ebé klaru, dijitalizasaun sistema no modernizasaun institusionál.
“Ita tenke moderna ita-nia instituisaun, nasaun seluk hanesan de’it, kuandu ita ba Indonézia, Austrália no Portugál tenke utiliza dokumentu ida de’it, la presiza lori dokumentu barak, ida-ne’e sistema internasionál, se ita hakarak atu tama ba ASEAN tenke halo tuir sistema internasionál”, nia afirma.
Nia hatutan, dezde 2002, Timor-Leste tama iha konstrusaun Estadu maibé agora ba oin tenke halo mudansa totál ba dokumentu ofisiál Estadu nian hanesan sertidaun baptizmu, kazamentu no seluk tan.
“Iha tinan 2000, ita hahú ho sertidaun baptizmu, depois ita halo sertidaun RDTL, depois ita halo kartaun eleitorál agora ita iha ona billete identidade, entaun billete identidade ne’e mak tenke sai hanesan dokumentu ofisiál, importante mak billete identidade, dokumentu seluk ne’e prova billete identidade nian”, nia dehan.
Ministériu Justisa sei halo sosializasaun iha munisípiu hotu kona-ba sidadaun hotu tenke iha billete identidade maibé asesu ho gratuita ka la selu.
“Kartaun eleitorál, dokumentu ida ne’ebé importante hodi uza ba eleisaun de’it”, nia konklui.
Jornalista: Hortencio Sanchez
Editór : Zezito Silva
