PR Horta hasoru malu ho Diretór-Jerál OMS
DILI, 05 outubru 2023 (TATOLI) – Prezidente Repúblika José Ramos Horta hasoru malu ho Diretór-Jerál Organizasaun Mundiál Saúde (OMS) Tedros Ghebreyesus hodi ko’alia kona-ba oinsa atu hametin kooperasaun.
“Hasoru malu ho Diretór Jerál OMS atu diskute hametin koperasaun kona-ba asuntu saúde oioin, liuliu Timor-Leste nia susesu iha kombate moras sira ne’ebé bele prevenene hanesan tuberkoloze no malária no mós hato’o nia asaun ba kampaña nasionál ba susubeen-inan iha Timor-Leste”, hatete iha komunikadu ne’ebé Agência TATOLI asesu hosi media Gabinete Prezidensial Repúblika (GPR), kinta ne’e.
Iha okaziaun ne’e, parte rua diskute mós Konferénsia ba Konvensaun Enkuadramentu Nasoins Unidas nian kona-ba Mudansa Klimátika (COP28) no nesesidade ba kompromisu polítiku iha nível aas liu atu asegura katak saúde iha sentru asaun klimátika nian.
Ramos Horta agradese ba Ghebreyesus tanba OMS nia apoiu ba Timor-Leste no hato’o nia kompromisu atu servisu hamutuk hodi hadia ema timoroan sira-nia saúde.
Sorumutu ne’e hanesan pasu pozitivu ida hodi hametin liután relasaun entre Timor-Leste ho OMS no hein katak sei lori dalan foun no inovadór atu hadia rezultadu saúde iha Timor-Leste.
Jornalista: Hortencio Sanchez
Editór : Zezito Silva
