Governu: Atleta prestasaun SEA Games Kamboja seidauk simu subsídiu
DILI, 06 outubru 2023 (TATOLI) – Ministru Juventude Desportu Arte no Kultura (MJDAK), Nélio Isaac Sarmento, hateten atleta ne’ebé ho prestasaun di’ak iha jogu SEA Games Kamboja 2023 to’o agora seidauk simu subsídiu tanba Governu anteriór la konsege tau osan.
“Los duni, atleta na’in-hira ne’ebé hatudu prestasaun iha SEA Games Kamboja seidauk simu buat ida, los, ida-ne’e responsabilidade Governu anteriór nian maibé la konsege, entaun tenke mai ministru mak responsabiliza no agora ita prepara hela”, Ministru Nélio ba Agência TATOLI, iha Faról, sesta ne’e.
MJDAK halo hela rekapitulasaun ba prestasaun atleta sira hotu hamutuk na’in-ualu, atu bele hetan subsídiu tuir atleta idaidak.
Atleta sira ho prestasaun mai hosi modalidade tolu hanesan Karate-do na’in-rua, Boxe na’in-rua no Taekwondo na’in-haat.
Governu anteriór la aloka osan subsídiu ba atleta ho prestasaun SEA Games iha Kamboja, tanba ne’e Governu sei tau fali iha Orsamentu Jerál Estadu (OJE) 2024.
Jornalista: Hortencio Sanchez
Editór : Zezito Silva
