DESPORTU, DILI, HEADLINE

MJDAK sei kria dekretu lei valoriza atleta ho prestasaun

MJDAK sei kria dekretu lei valoriza atleta ho prestasaun

Ministru juventude, Desportu, Arte no Kultura, Nelyo Isaac Sarmento. Imajen Tatoli/Egas Cristóvão

DILI, 06 outubtru 2023 (TATOLI) – Ministru Juventude Desportu Arte no Kultura (MJDAK) Nélio Isaac Sarmento, dehan Governu sei kria dekretu lei hodi valoriza atleta ho prestasaun ne’ebé di’ak.

“Agora ha’u atu kria tan diploma ne’e atu lori ba Konsellu Ministru hodi diskute sai ba dekretu lei atu fó atensaun ba atleta sira ne’ebé iha prestasaun di’ak iha eventu internasionál”, Ministru Nélio dehan ba Agência TATOLI iha Faról, sesta ne’e.

Nia dehan, valorizasaun ba atleta sira sei hakerek iha dekretu lei, iha parte oioin, la’os de’it fó insentivu ba atleta sira.

“Ita sei halo tipu ba prestasaun iha parte rua mak atleta sira ne’ebé prestasaun di’ak iha munisípiu, ita dehan kabe ba Prezidente Autoridade sira mak haree atleta sira no atleta sira ba prestasaun iha internasionál, Governu iha obrigasaun fó insentivu ba sira, maibé la’os insentivu de’it, ita mós bele fó bolsa estudu ba sira, subsídiu sosiál karik atleta ne’e la iha kondisaun uma, Governu tenke halo uma ida ba nia, seluk mak nia hakarak eskola Governu prontu atu selu nia”, ministru evela.

Aleinde ne’e, Governu mós hanoin hela bainhira atleta sira iha prestasaun di’ak bele fó oportunidade hodi sai hanesan Funsionáriu Públiku, FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL).

“Buat sira ne’e hotu sei ko’alia hotu iha dekretu lei, iha tempu badak, ha’u rasik sei aprezenta ba Konsellu Ministru hodi diskute”, nia relata.

Iha dekretu lei, MJDAK sei koordena ho Konfederasaun Desportiva Timor-Leste (CDTL-sigla portugés), Komité Olímpiku Timor-Leste (CONTL-sigla portugés) no parte desportu hotu hodi diskute hafoin submete ba diskusaun iha Konsellu Ministru.

Nia hatutan tan katak iha dekretu ne’e sei fó insentivu ba atleta nasionál sira ne’ebé hala’o treinamentu ho objetivu atu garante atleta sira-nia vontade.

Jornalista: Hortencio Sanchez

Editór : Zezito Silva

iklan
iklan

Leave a Reply

iklan
error: Content is protected !!