Ekipa tékniku MAPPF halo levantamentu ba kondisaun tratór iha munisípiu

DILI, 10 outubru 2023 (TATOLI) – Diretór Jerál Agrikultura, Martinho Laurentino Soares, dehan Ministériu Agrikultura Peska Pekuaria no Floresta (MAPPF) haruka ona ekipa tékniku ba munisípiu sira atu halo levantamentu ba kodisaun tratór sira ne’ebé fahe hosi Governu anteriór.
Tuir Martinho katak iha tratór barak mak Governu anteriór hola iha 2008, 2009 no 2010 liuhosi Ministériu Agrikultura hodi fahe ba agrikultór sira iha teritóriu nasionál ho objetivu atu hasae produsaun iha rai laran, maibé tratór barak mak kondisaun aat ona no labele halo operasaun.
IX Governu Konstitusionál liuhosi Ministériu Agrikultura Peskas Pekuaria no Floresta (MAPPF) halo fali levantamentu iha munisípiu sira iha teritoriu nasionál atu hatene tratór hira mak iha kondisaun aat ona, hira mak sei di’ak no hira mak bele tama ba leilaun.
“Informasaun ne’ebé ha’u iha katak tratór sira ne’ebé Governu uluk fahe ne’e barak mak aat ona. Agora daudaun ami forma hela ekipa ida mekániku de’it tama sai munsípiu atu halo servisu hodi halo levantamentu ba tratór sira-ne’e hira mak sei di’ak, hira mak aat ona, no hira mak ita atu halo leilaun”, Martinho Laurentino hateten ba jornalista sira MAPPF Comoro, tersa ne’e.
Nia salienta, MAPPF presiza halo duni levantamentu tanba labele koalia de’it tratór sira hotu avaria, maibé presiza halo levantamentu molok ita halo konsiderasaun.
“Levantamentu ba tratór sira-ne’e sei termina iha fulan ida-ne’e, bainhira levantamentu ne’e konklui sei bolu jornalista sira hodi fó sai ba públiku”, nia konklui.
Jornalista: Natalino Costa
Editór : Zezito Silva

