Governu sei estuda klean hafoin kria lei ba GAR
DILI, 10 outubru 2023 (TATOLI) – Prezidente Komisaun Reguladora Arte Marsiál (KRAM) Octavio da Conseição, dehan Governu sei halo estudu ne’ebé klean hafoin kria lei ba Grupu Arte Rituál.
“Durante mandatu Governu ida-ne’e nian, ita sei buka osan hodi halo estudu ne’ebé klean, halo peskiza atu buka hatene hafoin halo lei hodi regula arte rituál sira”, Prezidente hateten ba jornalista sira iha edifisiu KRAM Lecidere, ohin.
Governu presiza halo estudu no peskiza tanba GAR sira-ne’e maioria mai ho istória rezisténsia no kulturál.
“KRAM prontu atu halo lei ida-ne’e, maibé ita sei envolve ministériu relevante, entidade hotu ne’ebé iha koñesimentu ba GAR”, nia hatete.
GAR ne’ebé eziste iha Timor-Leste mak 77, 55, Kolimau 2000, 12-12, sagrada família no seluk tan.
Governu liuhosi KRAM kria de’it lei hodi regula Grupu Arte Marsiál (GAM) no seidauk iha lei ida própriu atu regula GAR.
Jornalista: Hortencio Sanchez
Editór : Zezito Silva
