Top

KAFI aprova ona reabilita irigasaun iha Seiçal, Irabere no Nunura

Kondisaun atuál infraestrutura irrigasaun Maliana II iha suku Tapo-Memo, postu administrativu Maliana, munisípiu Bobonaro. Imajen Tatoli/Sérgio da Cruz.

DILI, 10 outubru 2023 (TATOLI) – Diretór Jerál Agrikultura, Martinho Laurentino Soares, dehan Konsellu Administrasaun Fundu Infraestrutura (KAFI), aprova ona projetu reabilitasaun irigasaun tolu, ida iha tinan ne’e no rua iha tinan oin.

“KAFI aprova ona, reabilitasaun ka hadia tán irigasaun tolu, ida iha Seiçal (Baucau), ida iha Irabere (Viqueque) no ida iha Maliana iha área Ponte Nunura nian, hodi bele fornese be’e ba natar sira iha área ne’ebá, irigasaun tolu ne’e ida sei hadia iha tinan ne’e nia laran no rua sei hadia iha tinan oin”, Martinho Laurentino hateten ba jornalista sira MAPPF Comoro, tersa ne’e.

Nia subliña, orsamentu ba reabilitasaun ka hadia irigasaun tolu ho osan hosi Ministériu Agrikultura ne’ebé prevé iha fundu infraestrutura.

“Ha’u la lembra montante osan ba reabilitasaun maibé ezatamente osan ba reabilitasaun sira ne’e kuandu milliaun ida tenke aprova iha KAFI”, nia dehan.

Nia dehan, irigasaun ne’ebé sei reabilita iha tinan ne’e, KAFI halo ona prosesu konkursu, tanba ne’e tempu badak sei públika.

“Irigasaun tolu ne’e ida ne’ebé mak atu halo, ita hein de’it tanba prosesu konkursu agora daudaun KAFI halo hela”, Martino haktuir.

Iha biban ne’e, Diretór Jerál Agrikultura, Martinho Laurentino, informa totál irigasaun iha Timor-Leste hamutuk 27, iha irigasaun hamutuk 11 mak hadia ona.

Hosi irigasaun 11 ne’e, hadia hosi Programa Dezemvolvimentu Suku (PNDS) no hetan mós apoia finanseira hosi parseiru internasionál DFAT Austrália no JICA no parseiru intersionál sira seluk ne’ebé ajuda Govenu liuhosi kooperasaun hodi hadia ona irigasaun sira ne’e.

Área potesiál ba natar hamutuk 30.000 etare mak abandondu  

Iha biban ne’e, Diretór Jerál Agrikultura, Martinho Laurentino Soares, relata rai ne’ebé uza sai hanesan potensiál ba natár iha Timor-Leste hamutuk 70.000 etare.

“Ita-nia rai ne’ebé mak sai potensiál hodi halo natar tuir ministeériu agrikultura rejista hamutuk 70.000 etare. Hosi númeru 70.000 ne’e, rai ne’ebé ita agora uza ba halo natar ne’e 40.000 no rai ne’ebé agora ita abonadu iha 30.000 etare”, nia adianta.

Tanba ne’e, atu hasa’e produsaun iha rai laran no atu kontinua aproveita rai sira ne’ebé kontinua abondona mak Ministériu Agrikultura fó prioridade hodi hadia irigasaun.

“Atu hasae produsaun mak tenke hadia irigasaun tanba bee kuandu la iha, ita halo natar, sé mak atu ba kuru be’e atu rega, tanba ne’e, só atravez hosi fasilidade irigasaun”, nia konklui.

Jornalista: Natalino Costa 

Editór : Zezito Silva

Publisidade

Leave a Reply

Latest Post

error: Content is protected !!