Top

Defesoria Públika sei rekruta defesór hamutuk 34 no ofisiál 34

Defensor Públiku Jerál, Câncio Xavier. Imajen Tatoli/Dok

DILI, 11 outubru 2023 (TATOLI) – Defensoria Públika Jerál sei rekruta, iha tinan oin, Defensór Públiku hamutuk 34 no ofisiál ho objetivu atu fó asisténsia ba justisa ba povu ho di’ak liután.

“Agora daudaun, ita-nia rekursu Defensór Públiku iha 34, ami tau ona iha Planu Asaun Anuál  iha Orsamentu Jerál Estadu (OJE) 2024 atu halo tan rekrutamentu hodi aumenta rekursu ita-nia Defensór Públiku. Ita sei rekruta tán Defensór Públiku hamutuk 34 inklui Ofisiál ba Defensoria Públiku 34”, Defensór Públiku Jerál, Cancio Xavier ba jornalista TATOLI hafoin termina partisipa workshop ho tema ‘’Importánsia kuandru judisiáriu fraude internasionál, erru judisiáriu no partisipasaun ekonómia iha negósiu ne’ebé mak hala’o iha salaun auditóriu Ministériu Finansa, kuarta ne’e.

Nia revela, Defensoria Públika presiza aumenta rekursu tanba to’o agora rekursu sei limitadu.

“Ita presiza aumenta tán ita-nia Defensór Públiku sira, tanba iha nesesidade, bainhira implementa lei organizasaun judisiária hakarak ka lakohi ita-nia defesór sira tenke fó asisténsia justisa ba povu to’o iha baze”, nia adianta.

“Atu korresponde ba ezijénsia sira-ne’e mak hakarak ka lakohi ita tenke aumenta ita-nia rekursu, tanba lei organizasaun judisiária hateten kuandu implementa Tribunál Primeira Instánsia mak sei to’o hotu ba munisipiu sira, entaun agora ita tenke prepara rekursu ba ida-ne’e”, nia konklui.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!