Governu aloka $50.000 atu hadi’a kanalizasaun bee iha Merkadu Taibesi
DILI, 11 outubru 2023 (TATOLI)–Prezidente Autoridade Munisipiu Díli (AMD), Guilhermina Saldanha, hateten Governu aloka ona $50.000 atu bele hadi’a infraestrutura bázika hanesan kanalizasaun bee no sanementu iha merkadu Taibesi.
“Ida-ne’e sai nafatin preokupasaun. Iha tempu badak ami sei hadi’a, tanba sanyo ne’ebé Bee Timor-Leste ba troka aat ona iha semana kotuk. Ita iha orsamentu uitoan,” Prezidente AMD ne’e hateten ba jornalista iha Caicoli.
Nia hateten, utilizadór ba bee iha merkadu Taibesi ne’e barak liu fali ho volume no bee nia forsa, tamba ne’e mákina avaria lalais de’it.
“Fasilidade bee ne’eba ne’e la’ós de’it ba merkadu, maibé ema-ne’ebe hela iha área ne’eba mós uza hotu. Governu bele halo buat hotu, maibe konxiénsia ba uza bee mak seidauk iha, nune’e mákina funsiona durante oras 24 nia laran ne’e,” nia dehan.
Tuir Prezidente AMD, bee kanalizada iha merkadu ho objetivu atu vendedór sira bele fase sira nia produtu sira hanesan modo, fehuk no talas.
Antes ne’e, vendedór sira iha merkadu Taibesi hateten sira sosa bee sentavu 0,05 atu utiliza ba sira-nia nesesidade loro-loron no bainhira hala’o atividade negósiu.
Vendedór sira dehan, kuandu presiza sintina públiku, tenke fila ba sira ida-idak nia uma tanba sintina públiku iha merkadu Taibesi la funsiona kle’ur ona.
Jornalista : Jesuína Xavier
Editor : Cancio Ximenes
