DILI, 11 outubru 2023 (TATOLI) – Governu indika Ministra Edukasaun, Dulce de Jesus, hodi hahú prosedimentu aprovizionamentu ba implementasaun faze dahuluk projetu Basic Education Strengthening Transformation (BEST).
Projetu ne’e sei abranje konstrusaun no reabilitasaun eskola sanulu, nune’e mós atividade supervizaun no preparasaun dezeñu tékniku ba etapa tuirmai.
Tuir nota Governu, projetu BEST ne’e aliña ho Planu Setoriál Edukasaun Timor-Leste tinan 2020-2024 (PSE) no Planu Estratéjiku Dezenvolvimentu Nasionál (PEDN tinan 2022-2023) ho objetivu atu hadi’a asesu ba edukasaun bázika ho kualidade ba ema hotu, efisiénsia ensinu báziku tuir padraun sékulu 21 nian no apoia hodi implementa estratéjia dezenvolvimentu munisipál nian.
Projetu ne’e rezulta parseria ida entre Banku Mundiál no Timor-Leste, tuir Country Partnership Framework (CPF) tinan 2020-2024.
Projetu ne’e, sei implementa to’o tinan 2025, ho montante millaun $23,55, iha ne’ebé millaun $15 sei finansia liuhusi empréstimu husi Banku Mundiál-International Development Association (IDA) no millaun $9,1 sei hetan subsídiu husi Globál Partnership for Education (GPE).
Projetu BEST ho objetivu hasa’e profesór sira-nia efetividade, materiál aprendizajen no avaliasaun, nomós utiliza prosesu planeamentu no implementasaun bazeia ba dadus (data driven).
Notísia relevante: Governu asina akordu ho Banku Mundiál sobre projetu BEST
Jornalista: Osória Marques
Editora: Maria Auxiliadora
