Xefe Estadu enkoraja feto kandidata aan iha eleisaun Suku
DILI, 11 outubru 2023 (TATOLI) – Prezidente Repúblika, José Ramos Horta, husu ba feto hotu iha Timor-Leste atu kandidata aan ba Xefe Suku hodi kompete ho mane sira.
Tanba ne’e, Prezidente Repúblika husu ba sidadaun hotu atu hili kandidatura feto tanba Konstituisaun Repúblika Demokrátika Timor-Leste (RDTL) fó dalan no tuir kultura Timor-Leste nian fó mós oportuniade ba feto atu sai liurai.
“Ha’u hakarak haree kandidata feto barak liubá eleisaun mai ne’e, ita tenke fó fatin ba feto sira, ha’u hein katak kandidatura feto iha eleisaun suku ne’e mínimu 30%, di’ak liután 50%”, hatete Horta liuhosi mensajen ba eleisaun suku ne’ebé públika hosi media Gabinete Prezidensiál, kuarta ne’e.
Aleinde ne’e, nia alerta ba komunidade hotu iha territóriu nasionál atu hili kandidatura xefe suku foun ho didi’ak no identifika loloos ema ne’ebé hela duni iha suku laran no povu nia leet.
“Tenke hili kandidatu sira ne’ebé hela iha suku laran no aldeia, labele hili ema ne’ebé hela iha fatin seluk hanesan Dili no seluk tan”, nia hatete.
Nia apela ba eleitór sira atu fihir didi’ak kandidatura ida ne’ebé merese kaer ukun atu fó tulun ba populasaun iha suku laran.
“Husu ba eleitór sira fihir didi’ak lalika haree ba kor partidu, maibé haree ba ema ne’e atu feto ka mane bele ka lae atu haree populasaun iha suku laran”, nia alerta.
Prezidente Horta apela ba eleitór hotu atu kaer metin disiplina, hakribi violénsia no ameasa atu nune’e eleisaun suku la’o ho susesu.
Jornalista: Hortencio Sanchez
Editór : Zezito Silva
