DILI, 12 outubru 2023 (TATOLI) – Governu Japaun hamutuk ho Programa Nasaun Unida ba Dezenvolvimentu (PNUD) apoiu millaun $5,1 ba projetu infraestrutura komunitária ba reziliénsia hodi harii no rehabilita infraestrutura unidade 40 iha Ermera, Bobonaro, Liquiçá no Rejiaun Administrativa Espesiál Oé-Cusse Ambeno (RAEOA).
Husi totál orsamentu millaun $5,1 ne’e Governu japonés finansia millaun $4,8 no PNUD kontribui rihun $300. Projetu ne’e sei implementa durante tinan haat, entre 2023 no 2027.
Ba apoiu ne’e, ohin, Governu Timor-Leste no PNUD asina ofisialmente dokumentu ba projetu infraestrutura komunitária ba reziliénsia iha salaun VIP Ministériu Administrasaun Estatál (MAE), Colmera, Dili.
Reprezentante Rezidente PNUD iha Timor- Leste, Katyna Argueta, dehan harii no rehabilita infrastutura komunitária unidade 40 ne’e sei permite komunidade sira atu iha asesu di’ak liu ba saúde , edukasaun, merkadu, irrigasaun, bee-moos no saneamentu. Aleinde ne’e projetu sei kria empregu kurtu prazu ba komunidade liuhusi envolvimentu mão de obra kualifikada no lakualifikada durante prosesu konstrusaun.
Katyna Argueta hatutan konstrusaun infraestutura komunitária importante no presiza hadi’a asesu ba bee-moos no saneamentu, infraestrutura saúde ba komunidade rurál atu dezenvolve ekonómia no sosiál iha Timor-Leste.
Nia espera katak liuhusi intervensaun hirak ne’e bele iha rezultadu ne’ebé mellora povu nia kualidade moris iha projetu refere.
Embaixadór nipóniku, Kimura Tetsuya, afirma ho projetu ne’e bele kobre segmentu hotu iha sosiedade. “Konseitu foka ba protesaun no kapasitasaun individuál, partikularmente komunidade ne’ebé vulneravel liu. Ami espera reziliénsia komunidade sei hametin liuhusi implementasaun projetu ne’ebé kobre segmentu hotu iha sosiedade inklui saúde, edukasaun, bee-moos no saneamentu, merkadu no irrigasaun”, dehan.
Ministru Administrasaun Estatál, Tomás Cabral, salienta projetu ida ne’e apoia husi PNUD no Governu Japaun direitamente ba povu iha Ermera, Bobonaro, Liquiçá no RAEOA ba dezenvolvimentu Timor-Leste nian.
“Ha’u husu Japaun atu kontinua apoia PNUD hodi bele halo dezenvolvimentu di’ak liután ba infraestrutura sira iha área rurál sira”, realsa.
Nia dehan infraestrutura hirak ne’e krítiku iha área rurál tanba sei ajuda fornese asesu merkadu ba agrikultór nia produsaun, sentru saúde maternidade ba inan sira, sentru komunidade ba joven no buat barak tan. Projetu refere aliña tebes ho programa Governu Dasiak nian hanesan asesu ba infrastutura bázika, bee-moos no saneamentu, saúde , kreximentu ekonómiku no kriasaun empregu.
“Ita fiar katak infrastutura komunitaria krusiál atu garante reziliénsia no sustentabilidade ba ita-nian komunidade. Ami agradese tebes ba apoiu PNUD no Governu Japaun. Espera komunidade bele envolve direitamente iha projetu ne’e”, katak.
Notísia relevante: Japaun kontinua apoia programa dezenvolvimentu ba igualdade iha Timor-Leste
Jornalista: Osória Marques
Editora: Maria Auxiliadora
