DILI, 18 setembru 2023 (TATOLI)—Sekretária Estadu Iguldade (SEI), Elvina Sousa Carvalho, hateten Embaixada Japaun iha Timor-Leste nafatin iha kompromisu atu kontinua apoia programa dezenvolvimentu ba igualdade iha Timor-Leste.
“Embaixada Japaun kontinua apoiu, sei kontinua asiste ita iha ita-nia programa dezenvolvimentu liuliu ba sekretáriu estadu igualdade nian. Tanba ne’e, ohin dader ami hetan vizita hosi Embaixadór Japaun iha Timor-Leste, Tetsuya Kimura,” Elvina Sousa Carvalho hateten ba jornalista sira, iha salaun SEI, Dili, segunda ne’e.
Nia hatutan, Embaixada Japaun hanesan parseiru dezenvolvimentu importante ba Timor-Leste liuliu apoiu empoderamentu feto.
“Ita hotu hatene katak embaixada Japaun sai hanesan parseiru dezenvolvimentu importante ba Timor-Leste liuliu apoiu empoderamentu feto. Entaun objetivu entre SEI ho embaixada Japaun hodi ko’alia kona-ba kooperasaun saida mak ita haree ba iha future. Ohin, iha enkontru ne’e Embaixada Japaun nia parte prontu no kontinua kolabora hodi halo kooperasaun maibé parte rua sei halo diskusaun iha futuru. Ita sei iha kooperasaun ba diskusaun futuru no ha’u seidauk bele fó sai lai tanba diskusaun sei mai oin,” nia dehan.
Embaixadór Japaun iha Timor-Leste, Tetsuya Kimura, dehan parte rua ohin ko’alia kona-ba kooperasaun nian iha área asuntu jéneru nian iha Timor-Leste.
“Ha’u hakarak kongratula Sekretária Estadu ba ajenda ohin loron. Ami ko’alia kona-ba kooperasaun entre Japaun no Timor-Leste. Ha’u rasik iha esperiénsia serbisu nu’udar misaun permanente Japaun nian ba iha ONU iha asuntu jéneru, tanba ne’e ha’u fahe uitoan ha’u-nia esperiénsia kona-ba problema ne’ebé sira hasoru no prevensaun, hanesan redusaun risku dezastre ba feto, ne’ebé mak inísia hosi Governu Japaun,” Tetsuya Kimura hateten.
Tetsuya dehan Japaun mós hanesan nasaun ida ne’ebé durante ne’e affeta barak hosi dezastre naturál, tanba ne’e importante atu refleta fali aspetu jéneru no forma dezastre sira.
“Bazeia ba ida-ne’e, ami hakarak aborda liután ami-nia serbisu ho Timor-Leste. Durante ne’e apoiu ona projetu barak iha Timor hamutuk ho ONG sira hosi Japaun nian ne’ebé iha esperiénsia liu kona-ba servisu rurál nian hodi fo apoiu liuhosi hasa’e rendimentu ba feto. Apoiu ne’ebé ami oferese mak ajuda sira kuda modo, ai-funan no produsaun agrikóla seluk, hodi hasa’e sira-nia rendimentu. Aleinde ne’e, ami mós fó apoiu iha setór saúde, foka liu ba saúde inan nian (maternidade) liu hosi fó formasaun no kapasitasaun ba médiku sira no apoiu Makina Portable Ultrasound hodi sapoia saúde maternál,” nia dehan,
Jornalista : Osória Marques
Editór : Cancio Ximenes
