Deputadu Joaquim husu Governu foti desizaun evakua timoroan iha Israel
DILI, 16 outubru 2023 (TATOLI) – Deputadu hosi Bankada FRETILIN iha Parlamentu Nasionál (PN) Joaquim dos Santos, husu ba Governu atu foti desizaun ne’ebé sériu hodi evakua estudante timoroan sira ne’ebé daudaun ne’e hela iha Israel.
“Estadu, Governu tenke hola ona medida ba funu entre Israel no Palestina, ita tenke ko’alia ba malu ona atu proteje ita-nia maluk timoroan sira iha Israel ne’e”, Joaquim dehan liuhosi nia intervensaun iha plenária PN, segunda ne’e.
Nia dehan, Governu tenke book aan lalais tanba nasaun barak mak daudaun ne’e evakua ona sira nia sidadaun hosi Israel tanba haree ba funu.
“Ema nasaun seluk tur la hakmatek, buka meiu hodi lori sai sira-nia sidadaun, maibé ita lae, tur nonok de’it, ne’e labele”, nia revela.
Hatan ba asuntu ne’e, Vise Ministru ba Asuntu Parlamentar Aderito Hugo da Costa, hatete Governu akompaña hela situasaun Israel no Hamas nian liuhosi Ministériu Negósiu Estranjeiru no Kooperasaun (MNEK).
“Kona-ba funu iha Israel, Governu akompaña hela, ita durante ne’e halo kooperasaun ho Israel haruka timoroan sira ba halo estájiu iha Israel iha área agrikultura nian, agora daudaun sira hamutuk ema 51 no agora daudaun sira rasik iha kondisaun ne’ebé seguru”, Aderito salienta.
Jornalista: Hortencio Sanchez
Editór : Zezito Silva
