DILI, 17 outobru 2023 (TATOLI) – Ministru Juventude, Desportu, Arte no Kultura (MJDAK) Nélio Isaac Sarmento, simu delegasaun Komite 12 Novembru ne’ebé lidera hosi Donques Neves reprezenta Prezidente Komite 12 de Novembru Gregorio Saldanha iha sala enkontru MJDAC, Lecidere, Dili hodi aprezenta proposta estabelese akademia futeból.
Hasoru malu ne’e, Komite 12 Novembru aprezenta proposta ba estabelesementu Akademia Futeból ne’ebé sei harii iha Palaka, Postu Administrasaun Atabae, Munisípiu Bobonaro.
Proposta ne’e hetan resposta pozitivu no apresia ba Komite 12 Novembru nu’udar organizasaun independente ida-ne’e nia membru mai hosi sobrevivente masakre 12 Novembru.
“Apresia ba imi-nia hanoin no ideia no konseptu di’ak hodi ajuda mós dezenvolve futeból iha rai ne’e no proposta ne’e persiza halo diskusaun iha implementasaun no Governu tau konsiderasaun ba ida-ne’e”, Ministru Nélio dehan liuhosi komunikadu ne’ebé Agência TATOLI asesu hosi media MJDAK, ohin.
Ho nune’e, Komite 12 Novembru agradese ba Governu ne’ebé konsidera ona proposta ne’e no espera ho estabelesementu akademia futeból ne’e bele hamosu jogadór profisionál ne’ebé bele lori naran Timor-Leste iha internasional.
“Agradese ba ministru no ami prontu ho Governu hamutuk dezenvolve desportu iha ita-nia rai, espesialmente ba área futebol”, nia konklui.
Jornalista: Hortencio Sanchez
Editór : Zezito Silva
