DILI, 17 outubru 2023 (TATOLI) – Komandante Komandu Operasaun Nasionál, Polísia Nasionál Timor-Leste (PNTL), Superintendente Xefe Polísia José Soares, hateten PNTL prontu fó segsuransa seguransa ba eventu importante iha eleisaun ba lidér komunitária, atu eventu demokrátiku ne’e bele la’o di’ak.
“Ohin Komandu PNTL halo enkontru ida ho ofisiál responsavél sira hodi koalia kona-ba preparasaun PNTL hodi fó seguransa ba eleisaun xefe suku ne’ebé ita sei halo iha tempu badak. Ha’u atu afirma de’it katak PNTL ne’e sempre prontu fó seguransa ba eleisaun xefe suku, nune’e eventu eleisaun bele lao di’ak, ema hotu bele partisipa ho másimu hodi hili sira-nia lideransa suku ho di’ak”, Superintendente Xefe Polísia José Soares ba jornalista sira iha Komandu Jerál PNTL Caicoli, tersa ne’e.
Nia garantie katak eleisaun lider komuitária ba tinan ne’e sei lao ho di’ak no hakmatek, la iha pertubasaun ruma.
“Ita hotu hakarak eleisaun ida-ne’e lao di’ak, tanba ne’e husu ba komunidade sira kontribui ba pás no estabilidade, tanba situasaun atu hakmatek no konduzivu ne’e, komunidade mai hosi ita idak-idak nia kontrubuisaun”, nia adianta.
“Sidadaun sira tenke ajuda polísia tulun polísia iha kualker momentu hodi kria pás no estabilidade iha idak idak nia fatin hodi fó susesu ba eventu eleisaun ba lider komunitária sira”, komandante ne’e hateten.
Kona-ba efetivu hira mak Komandu Jerál sei hatún hodi apoia seguransa ba eleisaun xefe suku, nia dehan labele mesiona efetivu hira maibé ne’e kestaun tátiku no tékniku operasaun Komandu PNTL nian.
Jornalista: Natalino Costa
Editór : Zezito Silva
