iklan

NASIONÁL, HEADLINE

Tribunál Eklesiástiku Dili rejista pedidu anulasaun sakramentu matrimoniu 143

Tribunál Eklesiástiku Dili rejista pedidu anulasaun sakramentu matrimoniu 143

Vigáriu Judisiál Tribunál eklesiástiku arkidioseze Metropolitana Dili, Padre Graciano Santos Barros.Imajen Tatoli/Antonio Dosiparu

DILI, 17 outubru 2023 (TATOLI) –Tribunál Eklesiástiku Arkidioseze Metropolitana Dili, rejista pedidu hosi sidadaun sira ne’ebé rekere anulasaun sakramentu matrimonial hamutuk 143.

“Hosi totál kazu 143 ne’e, iha kazu 59 mak konsege hetan nulidade, kazu 66 mak sei pendente no kazu 16 iha hela prosesu no kazu rua mak iha hela rekursu ba segunda intánsia”, Vigáriu Judisiál Tribunál Eklesiástiku Arkiodioseze Metropolitania Dili, Padre Graciano Santos Barros, ba Agência TATOLI, iha kna’ar fatin-Dili. Dadus sira pertense ba dioseze Dili nian de’it”, afirma saserdote ba Tatoli, iha Lesidere.

Notísia relevante: Igreja Katólika TL estabelese Tribunál Eklesiástiku atende kazu sakramentu matrimóniu

Kazu sira ne’e, nia dehan rejista hahú tinan 2022 to’o 2023, ne’ebé pretense mai iha dioseze Dili de’it, nune’e seidauk konta ho pedidu rekursu ne’ebé  enkamina ba interdiosezana Maliana.

Estabelesimentu Tribunál Eklesiástiku arkiodioseze Metropolitana Dili hanesan tribunál primeira no segundu instánsia instituidu husi arsebispu dioseze Dili ho dekretu númeru protokolár 189/ch/IX/2019, ne’ebé hetan aprovasaun husi tribunál supremu Vatikanu ho asinatura apostólika ho dekretu protokolár numeru 3435/21 SAT, loron 7 fulan dezembru 2021

Objetivu estabelese tribunál eklesiástiku ne’e hodi atende nesesesidade espirituál sarani nian no mós halo julgamentu ba prosesu eklesiástiku sakramentu matrimóniu ho baze kódigu direitu kanónika.

“Tribunál ne’e la’ós halo julgamentu ba kazu sivil ka kazu krime sira, maibé Tribunál ne’e iha relasaun ho sakramentu kazamentu ka matrimóniu sira ne’ebe maka hetan problema tenke rezolve iha Tribunál Eklesiástiku”, esplika Padre Garciano

Tribunál Eklesiástiku iha primeira instánsia no segunda instansia atu haree kazu matrimonial, nune’e sidadaun sira la lori ona kazu ne’e ba Tribunál Sivíl, maibé mai deit iha Tribunál Eklesiástiku.

Hatan ba papél igreja nian atu evita pedidu anulasaun ba vinkulu matrimoniál, Padre ne’e dehan igreja hala’o hela sensibilizasaun ba padre parókia sira iha Díli no kontinua ba munisípiu Ermera.

“Kna’ar Padre parókia sira atu fortifika sira nia pastoral kona-ba preparasaun formasaun ba kazamentu mak bele evita problema iha família”, katak.

Notísia relevante: Tempu badak, MJ sertifika estatutu personalidade jurídika Igreja Katólika iha TL

Jornalista : Jesuína Xavier

Editór        :  Florencio Miranda Ximenes

iklan
iklan

Leave a Reply

iklan
error: Content is protected !!