Governu realiza iha novembru festivál ba ema ho defisiénsia
DILI, 18 outubru 2023 (TATOLI) – Diretór Jerál interinu Juventude no Desportu, Ministériu Juventude, Desportu, Arte no Kultura (MJDAK) Cesarino da Silva, dehan MJDAK ho liña ministeriál hamutuk ho parseiru juventude no desportu ba ema ho defisiente sei realiza festivál ba ema ho defisiénsia sira iha fulan novembru nia-laran.
“Sei iha festivál ba ema ho defisiénsia ne’ebé parte MJDAK hamutuk ho parseiru sira ajenda hela ba iha fulan novembru oin mai hafoin atleta Asian Paragames fila hosi Xina”, Cesarino dehan iha workshop kona-ba diseminasaun matadalan operasionál direitu partisipasaun Adoloxente no foinsa’e ho defisiénsia iha Timor-Leste ne’ebé hala’o iha Salaun Lux Clarita, ohin.
Festivál ne’ebé sei hala’o iha kategorizasaun juventude no desportu ba ema ho defisiénsia sira no husu atu entidade hotu kolabora.
“Foinsa’e no ema ho defisiénsia hosi liña ministeriál, sosiedade sivil no parseiru organizasaun ba ema ho defisiénsia, Governu iha polítika nasionál juventude iha nia programa ne’ebé ligadu ba grupu alvu ida mak ko’alia kona-ba juventude no defisiénsia sira”, diretór afirma.
Diretór Jerál Interino MJDAK mós agradese ba partisipasaun entidade hotu iha diseminasaun matadalan ba asuntu ema ho defisiénsia sira.
“Atu konkretiza ida-ne’e mak Governu kria espasu no iha MJDAK iha Parlamentu Foinsa’e nia (PFN) iha kuota ba ema na’in rua mai hosi ema ho defisiénsia. Iha mós akampamentu ba ema ho defisiénsia iha munisípiu enkuantu dezenvolvimentu fíziku ema ho defisiénsia MJDAK servisu hamutuk ho Komite Paralimpiku Nasionál Timor-Leste (CPNTL) no Special Olimpic Timor-Leste (SOTL) hodi lori atleta defisiénsia sira ba partisipa eventu desportu internasionál”, Cesarino adianta.
Diseminasaun ne’e atu introdus matadalan operasionál direitu partisipasaun ba adoloxente no foin-sa’e ho defisiénsia sira-nian ne’ebé dezenvolve ona hosi Ajénsia Nasaun Unidas ba labarik sira (UNICEF) iha Timor-Leste ne’ebé parseira ho MJDAK hodi fornese matadalan ne’ebé sei utiliza ba entidade Governu hothotu.
Jornalista: Hortencio Sanchez
Editór : Zezito Silva
