iklan

JUSTISA, HEADLINE

PGR husu entidade sériu proteje labarik iha Timor-Leste

PGR husu entidade sériu proteje labarik iha Timor-Leste

Prokuradór Jerál Repúblika, Alfonso Lopes. Imajen/ Tatoli

DILI, 18 outubru 2023 (TATOLI) – Prokuradór Jerál Repúblika (PGR), Alfonso Lopez, husu ba entidade hotu atu sériu hodi proteje ba labarik sira iha Timor-Leste nia direitu.

Nia dehan, problema protesaun direitu ba labarik sai hanesan asuntu nasionál, tanba labarik ki’ik barak la eskola no hili halo servisu, tanba ne’e PGR realiza konferénsia internasionál ho tema promove no optimaliza bem estar labarik sira iha Timor-Leste.

Hosi konferénsia internasionál ho objetivu atu Ministériu Soliadriadade Sosiál no Inklusaun (MSSI) liuhosi Diresaun Reinsersaun Sosiál, Parlamentu Nasionál, hamutuk ho entidade hotu-hotu Instituisaun Estadu sira, rede ba defeza direitu labarik, organizasaun Uma Mahon inklui parseiru internasionál atu halo diskusaun ida atu bele iha seriedade ba protesaun direitu labarik.

Konstitusaun RDTL 18 deskreve katak direitu ba labarik signifika labarik sira tenke goza duni nia direitu ba moris, maibé realidade labarik barak sei halo servisu todan, tanba ne’e hothotu iha obrigasaun atu fó potesaun ba labarik.   

Nia dehan, defeza ba direitu labarik no joven sira, liuliu sira ne’ebé vulnerável no iha perigu la’ós asuntu ida ne’ebé ki’ik no ko’alia kona-ba asuntu ne’ebé ita hotu nian.

“Ita hatene ona katak dever boot kona-ba protesaun ba labarik sira kompete ba projenitór sira, maibé, família, tenke preparadu atu atua no intervene bainhira iha perturbasaun ne’ebé tau iha kauza direitu labarik no joven sira nian, hanesan ema ruma hatete ona no lós, labarik sira la reklama, maibé sira labele hein”, Alfonso Lopez, dehan iha Timor-Plaza, ohin.

Nia dehan, nesesidade duni presiza servisu hamutuk ho interveniente prinsipál sira iha funsionamentu sistema protesaun ba labarik no joven sira ne’ebé iha perigu previstu iha Lei n.º 6/2023, loron-1 marsu.

“Ha’u hakarak mós atu agradese ho forma espesiál ba UNICEF ba pesoa ninia reprezentante rezidente ba apoiu ne’ebé fundamentál ba realizasaun konferénsia ida-ne’e, laiha kolaborasaun, konferénsia sei la hala’o tuir moldura ne’ebé hala’o daudaun”, nia informa.

Iha fatin hanesan, Vise Ministru MSSI Céu Brites, hateten Governu kompromentidu kontinua halo esforsu hodi halo protesaun ba labarik ki’ik sira.

“Governu agora halo hela esforsu liuhosi INDIKA ne’ebé halo protesaun ba labarik sira no sei halo programa barak hamutuk ho parseiru internasionál sira atu halo protesaun ba labarik  ho di’ak liután”, governante ne’e haktuir.

Nia dehan, Ministériu Solidadaridade Sosiál no Inklusaun liuhosi Diresaun Reinsersaun Sosiál servisu hamutuk ho uma mahon hamutuk 27 iha Timor-Leste kontinua halo protesaun ba labarik sira hosi ameasa oioin.

Prezidente Komisaun F Maria Bareito Gorumali, hateten konferénsia internasionál ne’ebé PGR no UNICEF halo ne’e nudar pontu pozitivu tebes tanba Timor-Leste iha ona lei protesaun ba labarik no joven iha perigu nia laran.

Nia dehan, lei ne’e nudar lei dahuluk iha Timor-Leste oinsá fó protesaun ba labarik no joven iha perigu nia laran, oinsá Ministériu Públiku bele haree lei sira ne’e.

“Hosi ida-ne’e klaru katak bele fó atensaun ba entidade hotu liuliu ba inan aman, lider komunitáriu sira no sosiadade sivil oinsá mak bele iha konsiénsia iha obrigasaun ita bele proteje  labarik nia direitu no promove labarik nia direitu iha ita-nia família”, nia afirma.

Nune’e mós, reprezentante UNICEF iha Timor-Leste Bilal Aurang Zeb Durrani, hateten MSSI no UNICEF mós kontinua harii kapasidade servisu sosiál sira-nian hodi kumpre mandatu atu promove no responde ba kestaun sira ne’ebé afeta ba labarik sira.

Nia dehan, UNICEF mós apoia Ministériu Públiku iha programa sensibilizasaun bazeia ba eskola kona-ba direitu labarak.

Jornalista: Natalino Costa 

Editór : Zezito Silva

 

iklan
iklan

Leave a Reply

iklan
error: Content is protected !!