Governu sauda IKS-PTL realiza kampionatu nasionál
DILI, 19 outubru 2023 (TATOLI) –Vise Primeiru-Ministru, Ministru Koordenadór Asuntu Sosiál Mariano Assanami Sabino, sauda Organizasaun Arte Marsiál (OAR) IKS.PTL tanba realiza kampionatu nasionál, iha Jináziu Dili, durante loron tolu.
“Hau lori Primeiru Ministru, Kay Rala Xanana Gusmão nia-naran apresia ba ita-boot sira-nia inisiativa, Xefe Governu nia hakarak mak ida-ne’e duni, atu imi bele sai ajente ba desportu no ajenta ba pás”, Assanami dehan ba estrutura no membru IKS-PTL liuhosi komunikadu ne’ebé Agência TATOLI asesu, ohin.
Assanami husu ba membru organizasaun hothotu atu kaer metin prinsípiu, filosofia organizasaun nian hodi treinu ho profisionál atu bele kontribui ba sosiedade ida modernu, sosiedade sivilizadu hodi bele sai ajente ba pás no estabilidade.
Prezidente IKS.PTL, Silvestre Sufa, hatete kompetisaun hahú, ohin, ho objetivu atu buka atleta kualifikadu hosi Organizasaun IKS.PTL nian ne’ebé sei envolve ema na’in lima kada ranting iha territóriu nasionál.
Tuir nia, iha kompetisaun ne’e mak bainhira haree atleta ne’ebé kualifikadu mak IKS.PTL sei prepara sira hodi ba tuir kampionatu nasionál ne’ebé Festil planu ona atu loke iha novembru, ne’ebé tuir informasaun sei envolve grupu hotu arte marsiais ne’ebé eziste.
“Iha kompetisaun mak haree atleta se mak di’ak liu bele entrega ba Estadu atu dezenvolve hodi sai atleta nasionál hodi reprezenta Estadu ba tuir eventu internasionál”, hatete Sufa iha komunikadu ne’e.
Governu hakarak ba oin loke eventu Silat Internasionál atu bele konvida sira hosi nasaun seluk mai partisipa no husi Timor-Leste mós bele ba iha rai liur.
Jornalista: Hortencio Sanchez
Editór : Zezito Silva
