DILI, 20 outubru 2023 (TATOLI) – Prezidente Konsellu Administrasaun Eletricidade de Timor-Leste (EDTL, E.P), Paulo da Silva, hateten, empreza estatál ne’e sei lansa projetu distribuisaun eletrisidade ba aldeia 57 iha territóriu nasionál.
“Ba projetu fornesimentu enerjia elétrika ba aldeia 57 ne’e, ita iha ona dezeñu no Bill of Quantity (BoQ), nune’e tempu badak ita sei lansa konkursu atu empreza sira ne’ebé iha kapasidade finaseiru no tékniku bele konkorre”, dehan Prezidente EDTL, E.P ne’e ba Agência TATOLI iha kna’ar fatin-Caicoli,Dili.
Notísia relevante: PM fó orientasaun ba EDTL “tinan ne’e suku hotu tenke asesu enérjia elétrika”
Tuir dadus ba fornesimentu elétrika nasionál ba iha nível suku asesu ona 95%, falta 5% mak seidauk asesu ne’ebé koresponde ho suku 26, maibé nia prosesu hotu iha hela faze konstrusaun hela.
“Ita iha aldeia 200 mak seidauk hetan asesu liña eletrisidade iha teritóriu nasionál, ne’e la sura ho Rejiaun Administrativu Espesiál Oé-Cusse no Ambeno. Ita foku ona aldeia 57 ba restante aldeia ne’e ita nia tékniku sira kontinua halo levantamentu dadus”, nia informa.
Ekipa tékniku EDTL mós halo hela levatamentu ba aldeia ka suku ne’ebé dook husi eletrifikasaun ezistente mak sei fornese solár painel atubele populasaun asesu naroman.
“Ha’u garante ligasaun liña eletrisidade ba suku sira sei konklui iha tinan ida ne’e no nível aldeia sei konklui iha tinan oin. Atubele deklara katak populasaun hotu-hotu iha Timor-Leste asesu liña elétrika,” Prezidente ne’e garante.
Antes ne’e, Konsellu Administrasaun EDTL aprova ona polítika hanaran projetu komunitária entre tékniku sira ho komunidade nune’e enérjia elétrika tenke to’o hotu komunidade nia uma.
Iha mandatu VIII Governu Konstituisionál konsege promove projetu eletrifikasaun faze tolu, dahuluk hamutuk pakote 34 kobre suku 22 ne’ebé konstrusaun la’o hela no kuaje balun finaliza no balun iha progresu.
Enkuantu iha faze daruak ho pakote 44 kobre suku 22, nune’e parte empreza asina ona kontratu ho EDTL ne’ebé balun tama daudaun ne’e ona faze mobilizasaun material no balun halo ona inaugurasaun.
Nune’e, mós faze datoluk totál 36 pakote kobre suku 23, ne’ebé prosesu avaliasaun tékniku no finánsia hotu ona no konklui atu asina kontratu ho empreza responsável sira hahú ona halo konstrusaun.
EDTL transforma-aan ona ba empreza públika oinsa mak atu hatún kustu produsaun ba setór eletrisidade tanba tinan-tinan governu aloka millaun $6-resin sosa gazoel ba sentrál elétrika Hera no Betano hodi distribui enérjia elétrika ba timor laran tomak.
Notísia relevante: EDTL promete populasaun tomak asesu enérjia elétrika iha 2023
Jornalista: Jesuína Xavier
Editór : Florencio Miranda Ximenes
