iklan

JUSTISA, HEADLINE

Juiz STJ na’in haat no auditór tuir kursu espesializada iha sentru judisiáriu Portugal

Juiz STJ na’in haat no auditór tuir kursu espesializada iha sentru judisiáriu Portugal

Prezidente Tribunál Rekursu, Deolindo dos Santos. Imajen Tatoli /Egas Cristovão.

DILI, 20 outubru 2023 (TATOLI) – Prezidente Tribunál Rekursu Deolindo dos Santos, dehan Juiz hosi Supremu Tribunál Justisa (STJ) na’in-haat inklui auditór na’in-haat tuir hela kursu direitu espesializada durante fulan-neen iha Sentru Formasaun Judisiária Portugál, hirak ne’e hahú tuir formasaun iha setembru.

“Iha juiz na’in-haat no ita-nia auditór na’in-haat mak agora daudaun tuir hela formasaun iha Sentru Formasaun Judisiária Portugal no iha fim outubru ida-ne’e ita sei haruka tán auditór na’in-haat ba Portugal hodi tuir formasaun iha ne’ebá”, Deolindo dos Santos ba jornalista sira hafoin ensera kursu formasaun ba Juiz sira ne’ebé hala’o iha Hotel Timor, sesta ne’e.

Nia rekorda, formasaun ba juiz timoroan sira ne’e iha tanba ho baze ba kooperasaun ne’ebé mak Prezidente Tribunál Rekursu Deolindo dos Santos, halo ho majistratura judisiária no Sentru Formasaun Judisiária Portugal iha 2019.

Nia dehan, Juiz sira nain-haat ne’ebé agora daudaun tuir hela formasaun iha Portugal ne’e Juiz sira ne’ebé halo sevisu iha Supremu Tribunal Justisa no Juiz balun ne’ebé halo funsaun iha Tribunál Judisiál Primeira Instánsia sira.

Enkuantu, auditór na’in-haat ne’ebé haruka ba Portugal ne’e, auditor sira ne’ebé mak agora daudaun halo funsaun iha Tribunál Kamára Konta.

“Baihira sira ne’e finaliza sira-nia formasaun durante fulan neen iha Portugal, sira sei halo estájiu iha Tribunál sira iha portugál”, nia adianta.

Deolindo informa, materia ne’ebé mak sira aprende mak servisu Juiz no uditoria nian kona-ba área direitu liuliu lei no diploma sira ne’ebé Timor-Leste no Lei Portugal nian inklui situasaun globál.

“Formasaun espesializada sira hanesan ne’e, ita presiza duni halo ba ita-nia Juiz sira, iha rai li’ur no iha rai laran, inklui mós ba autór judisiáriu sira seluk hanesan Ministériu Públiku mós importante oinsá sira bele aprezenta ba Tribunál ho faktu ho di’ak atu nune’e aprezenta ba Tribunál prosesu bele la’o di’ak”, nia afirma.

“Tanba mundu ida agora ho mundansa teknolojia ne’ebé krime sira mosu ho tipu ida oioin tanba ne’e kapasitasaun sira hanesn ne’e sei kontinua iha future, la’os ba Juiz sira ne’ebé agora tuir formasaun iha Portugal de’it maibé ba oin ita sei kontinua haruka nafatin ita-nia Juiz atu reforsa servisu judisiáriu iha Timor-Leste liuliu servisu Tribunál”, nia dehan.

Juiz hosi TJPI tolu konklui sira-nia kursu espesializada iha área kriminalidade ekonómiku no finansiamentu  

Iha sesta (20/10) ohin mós Prezidente Tribunál Rekursu halo enseramentu ba kursu espesializada iha área kriminalidade ekonómiku no finansiamentu ba Juiz sira.

Kursu espesializada ne’e realiza tanba kooperasaun entre Tribunál Rekursu hamutuk ho União Europeia liuhosi Insitutu Camões liuhosi programa osan povu nian jere ho di’ak.

Kursu espesializada ne’e hala’o iha Munisípiu Baucau, durante fulan ida ne’ebé partisipa hosi  Juiz sira hotu hosi Tribunál Judisiál Primeira Instánsia Baucau, Díli, Covalima (Suai) inklui  Juiz sira Tribunál Oecusse,

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!