Top

SEKOMS: Tempu dijitál joven tenke kriativu

Sekretáriu Estadu Komunikasaun Sosiál, Expedito Dias Ximenes. Imajen Tatoli/Francisco Sony

DILI, 20 outubru 2023 (TATOLI) – Sekretáriu Estadu Komunikasaun Sosiál (SEKOMS), Expedito Dias Ximenes, dehan mundu agora ne’e buat hotu dijitál, tanba ne’e, joven tenke kriativu.

Lia hirak ne’e tun hosi Expedito bainhira halo abertura ba kompetisaun festivál filme juventude timorense ho tema “juventude timorense iha tempu agora’’ tinan ne’e realiza hosi Casa de Produção Audivisual (CPA) ho objetivu atu hafanu joven sira hodi kriativu iha mundu agora.

Nia akresenta, mundu ida agora tama ona era dijitál, buat hotu la’o lalais tebes kompara ho tempu uluk, téknolojia avansu agora, obriga joven sira tenke adapta aan tanba joven iha obrigasaun atu envolve aan iha kualker atividade atu bele kompete iha mundu atuál.

“Ha’u lori IX Governu Konstitusionál agradese ba CPA tanba kompetisaun ida-ne’e di’ak tebes atu buka promove no hakbi’it joven sira-nia talentu. Ohin ha’u mai só para mai fo motivasaun oituan tanba sira atu kontinua ho sira nian talentu ne’ebé mak iha. Sira hanesan futuru ba nasaun prepara aan antes”, Expedito Dias Ximenes hateten iha Xanana Sport Center, Bairro dos Grilhos, sesta ne’e.

“Ho tempu dijintál ne’ebé mak oras ne’e mundu ohin loron iha, ita tenke atualiza ita nia aan hodi  halai tuir tanba agora la’os ona uluk , agora ne’e bele dehan lalais”, nia adianta.

Nia apresia ho joven sira ne’ebé konkore iha kompetisaun festivál filme tinan ne’e, joven sira ne’e iha vontade hodi tuir kompetisaun ne’e hodi duni sira-nian kriatividade ne’ebé sira iha.

Iha biban ne’e, Expedito mós agradese ba CPA, tanba hola insiativa ne’ebé di’ak hodi promove jove sira tanba joven sira hanesan futuru ba nasaun, entaun presiza prepara aan iha setór oioin hanesan iha setór komunikasaun sosiál, liuhosi ne’e bele kriativu hodi prodús video hosi inspira ema seluk.

Iha fatin hanesan, responsavél Rui Muakandala hateten, CPA tinan ne’e organiza  kompetisaun festivál joven timor ho tema “ joven timorese iha tempu agora”, ne’e atu fó oportunidade ba joven sira atu bele promove joven sira-nia kriatividade.

“Kompetesaun festivál filme juventude timorense iha tinan ne’e nudar edisaun daruak ne’ebé CPA halo ho objetivu oinsa ita organiza filme ida forma ida, hodi fó oportunidade ba juventude sira ne’ebé iha kriatividade iha talentu oinsá atu espresa no bele promove sira-nia talentu”, nia dehan.

Rui Muakandala hateten, ba tinan ne’e grupu joven kriativu hamutuk 51 mak rejista tuir kompetisaun festivál filme no grupu joven hamutuk 37 mak admitidu hodi konkore.

“Aban sira hahú prodús ona sira nian filme no rezultadu filme ne’e grupu joven kriativu sei submete ba juri no rezultadu sei fó sai iha iha fulan fim do ano ne’e, iha ámbitu festvál filme  joven timorense ne’ebé sei hala’o iha loron 7-8 fulan dezembru tinan ne’e”, nia dehan.

Totál orsamentu hodi organiza eventu kompetisaun festivál joven timorense tinan ne’e $5.000 no grupu joven ne’ebé selesionadu top-10 hanesan mellór grupu joven kriativu iha eventu  kompetisaun ne’e sei hetan osan.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!