JICA matein kooperasaun ho Governu Timor-Leste
DILI 𝟮𝟲 o𝘂𝘁𝘂𝗯𝗿𝘂 𝟮𝟬𝟮𝟯 (TATOLI) – Ministru Negósiu Estranjeiru no Kooperasaun, Bendito dos Santos Freitas, enkontru ho Prezidente foun Ajénsia Kooperasaun Internasionál Japaun (JICA-sígla inglés), Tanaka Akihiro, hodi ko’alia kona-ba reforsu kooperasaun entre Governu Timor-Leste ho Governu Japaun liuhosi ajénsia JICA iha Timor-Leste ne’ebé eziste durante tinan 20 nia-laran.
“Governu Timor-Leste hahú estabelese kooperasaun ho Governu Japaun liuhosi nia ajénsia JICA iha tinan 2002, iha ne’ebé durante tinan 20 ne’e, servisu hamutuk ho liña ministeriál sira hodi implementa importante lubuk ida ne’ebé hatudu rezultadu di’ak tebes”, Ministru Bendito rekorda liuhosi komunikadu ne’ebé Agência TATOLI asesu, ohin.
Iha sorumutuk ne’e, Prezidente JICA mós aprezenta revizaun foun ba Japaun nia 𝘎𝘰𝘢𝘭𝘴 𝘰𝘧 𝘊𝘰𝘰𝘱𝘦𝘳𝘢𝘵𝘪𝘰𝘯 iha Japaun nia 𝘋𝘦𝘷𝘦𝘭𝘰𝘱𝘮𝘦𝘯𝘵 𝘊𝘰𝘰𝘱𝘦𝘳𝘢𝘵𝘪𝘰𝘯 𝘊𝘩𝘢𝘳𝘵𝘦𝘳 ne’ebé ka’er metin prinsípiu seguransa umana no kooperasaun ho parseiru sira iha 𝘤𝘰-𝘤𝘳𝘦𝘢𝘵𝘪𝘰𝘯 katak servisu hamutuk hodi implementa programa.
“JICA nia prontidaun kontinua apoia Timor-Leste nia prosesu adezaun ba ASEAN, kapasitasaun rekursu umanu no mós iha setór infraestruruta liuliu konstrusaun ba aeroportu internasionál Prezidente Nicolau Lobato, Dili, tanba aeroportu nu’udar odamatan boot ba mundu, bainhira Timor-Leste sai membru ASEAN”, Prezidente JICA hateten iha komunikadu ne’e.
Tanba ne’e, Ministro Bendito Freiras, lori Governu Timor-Leste nia naran, apresia no agradese ba Governu no povu Japan ne’ebé fó nia apoiu tomak desde inísiu hodi organiza enkontru ho doador dahuluk iha 1999 to’o ohin.
“Ita nafatin husu Governu Japan nia apoiu liu husi JICA hodi tau matan nafatin ba Timor-LesteL nia esforsu ba dezenvolvimentu ekonómiku, turizmu, indústria peska, no seluk tan,” Bendito dehan.
Sorumutuk ne’e, akompaña mós hosi Embaixadór Japaun iha Timor-Leste, Tetsuay Kimura no Reprezentante JICA iha Timor-Leste, Mimpei Ito, Diretora Jerál ba Assuntu ASEAN, Elisabeth Exposto no seluk tan.
Jornalista: Hortencio Sanchez
Editór : Zezito Silva
