DILI, 26 outubru 2023 (TATOLI) – Prezidente Organizasaun Arte Marsiál (OAM) Persaudaraan Setia Hati Terate (PSHT), Baltazar Lemos Seixas, alerta ba membru hotu iha territóriu nasionál atu mantein nafatin pás hodi kontribui ba dezenvolvimentu nasionál.
“Husu ba membru hotu iha Timor-Leste laran tomak atu mantein pás, tenke pasiénsia maske provokasaun oioin mosu, hatudu nafatin ita-nia kontribuisaun di’ak ba nasaun, sai ezemplár ba organizasaun hotu hodi promove pás”, Prezidente Baltazar dehan ba jornalista sira iha edifísiu Ministériu Juventude no Desportu Arte no Kultura (MJDAK) Lecidere, ohin.
Nia kontinua apela nafatin ba membru hotu atu mantein nafatin pás durante tempu finadu atu ema hotu bele moris hakmatek no selebra loron matebian iha ámbitu ne’ebé hakmatek.
Tuir nia, problema ne’ebé akontese iha ne’ebé de’it hanesan problema individu no labele kait ba mai hodi lori organizasaun nia naran.
“Husu ba ita hotu, nu’udar timoroan tenke komprende, tenke pasiénsia hodi kontribui ba nasaun nia di’ak”, nia relata.
Iha fatin hanesan, Prezidente OAM IKS-PTL Silvestre Sufa, husu ba membru hotu, hahú ohin, ba oin tenke kria pás iha nasaun ida-ne’e tanba nasaun boot liu organizasaun.
“Hahú ohin ba oin membru hotu iha ne’ebé de’it tenke kria pás iha fatin ne’ebé de’it mak imi hela, tenke hakruk ba lei ne’ebé mak estabelese iha ita-nia nasaun ne’e”, Silvestre hatete.
Nia dehan, problema pesoál labele lori tama ba organizasaun maibé tenke buka meiu hodi rezolve ho ulun malirin no simu malu nu’udar timoroan.
“Organizasaun la hanorin ita-boot sira atu halo krime iha fatin ne’ebé de’it, ita tenke garante unidade iha ita-nia nasaun ne’e”, nia relata.
Nia mós husu ba membru sira atu hakmatek durante eleisaun suku ne’ebé sei akontese iha 28 outubru semana ne’e, nune’e iha loron matebian ne’ebé akontese 02 novembru tenke la’o iha ámbitu hakmatek.
Jornalista: Hortencio Sanchez
Editór : Zezito Silva
