Top

Membru PNTL dezloka ona hodi asegura eleisaun suku

Membru Polísia Nasionál Timor-Leste (PNTL) sira iha seremónia dezlokasaun iha kampaun UEP hodi ba apoiu Eleisaun Suku iha dia 28 outubru iha territóriu Timor-Leste, Dili (26 otubru 2023). Imajen Tatoli/António Daciparu

DILI, 25 outubru 2023 (TATOLI) ­- Membru Polísia Nasionál Timor-Leste (PNTL), dezloka ona ba munisípiu sira atu reforsa rekursu iha Komandu Munisipál ho objetivu atu apoia seguransa iha eleisaun suku ne’ebé sei akontese iha 28 outubru.

“Ohin ita hala’o serimónia parada ida hodi halo dezlokasaun ba ita-nian membru PNTL sira atu apoiu rekursu Komandu PNTL Munisípiu sira hodi fó seguransa durante eleisaun suku”, Komandante Jerál PNTL, Komisáriu Jerál Polísia, Henrique da Costa, hateten ba jornalista sira iha kuartel Unidade Espesiál (UEP) Bairro Pite, kinta ne’e.

Membru sira ne’ebe mak komandu hili hodi dezloka ba munisípiu sira mak membru PNTL mai hosi Kuartel Jerál, membru UEP, UPM UPF, Servisu Imigrasaun inklui membru PNTL hosi Sentru Formsaun Polísia (CFP, sigla portugés).

“Totál membru ne’ebé Komandu Jerál dezloka ba munisípiu, nia númeru ami sei la fó sai, maibé ha’u atu dehan de’it katak membru sira ne’e sei ba apoiu Komandu PNTL Munisípiu sira tanba rekursu sei menus”, nia informa.

Henrique hateten, membru PNTL ne’ebé dezloka ba munisípiu sei halo nia funsaun hodi asegura  no akompaña eleitorál eleisaun suku lao to’o finál mak sira foin tún fali mai Díli.

“Ha’u husu ba membru PNTL sira nafatin halo servisu ho profisionál no neutru, tenke servisu ho autoridade munisipál sira no autoridade lokál, komunidade hodi asegura eventu demokrátiku bele la’o di’ak”, nia fó-hanoin.

Kona-ba transporte, Henrique hatan katak ida-ne’e sai limitasaun ba PNTL bainhira membru sira halo sira-nia funsaun iha terenu hodi fó seguransa iha eventu demókratiku, maibé hanesan ajente seguransa ba povu no nasaun PNTL firme nafatin atu fó seguransa.

“Biar transporte sai problema hanesan karreta ba PNTL la to’o atu uza halo seguransa, maibé esforsu atu jere oinsá kontinua uza partrimóniu PNTL ne’ebé oras ne’e iha hodi halo seguransa, tanba PNTL iha atu fó seguransa no sempre prontu atu fó seguransa”, nia konklui.

Jornalista: Natalino Costa 

Editór : Zezito Silva

Publisidade

Leave a Reply

Latest Post

error: Content is protected !!