Horta fó posse ba Brigadeiru Jenerál Trix troka Klamar Fuik
DILI, 30 outubru 2023 (TATOLI) – Prezidente Repúblika, José Ramos Horta, fó pose ba Brigadeiru Jenerál José da Costa Soares Trix nu’udar Xefe Estadu Maior Falintil Forsa Defeza Timor-Leste (F-FDTL).
Brigadeiru Jenerál José da Costa Soares Trix simu posse hanesan Xefe Estadu Maior das Forsas Armadas hodi troka Xefe Estadu-Maior das Forsas Armadas Sesante, Contra-Almirante Donaciano do Rosário Gomes “Pedro Klamar Fuik”, ne’ebé oras ne’e asume ona kargu nu’udar Ministru Defeza ba IX Governu Konstitusionál.
“Ho mudansa lideransa ida-ne’e bele dinamiza no adaptável liután ba servisu sira iha forsa armada hodi hasoru dezafiu foun sira iha tempu agora no ba futuru, tuir misaun ne’ebé Konstituisaun RDTL atribui, liuliu iha ambiente operasionál ne’ebé depende ba sistema integradu nasionál hodi haforsa kooperasaun ne’ebé amigavel ho nasaun viziñu no rejionál”, hatete Horta bainhira fó posse ba Trix, iha Palásiu Prezidensiál, ohin.
Bainhira ramata posse Brigadeiru Jenerál José da Costa Soares ‘’Trix’’ promete sei fó dedikasaun tomak hodi reforsa Instituisaun F-FDTL.
“Ha’u-nia komitmentu mak atu kontribui ba reforsa planeamentu jerál no koordenasaun atividade sira ne’ebé tutela iha Xefe Estadu Maior das Forsas Armadas, hodi dinamiza liután servisu operasionál sira”, Trix konklui.
Jornalista: Hortencio Sanchez
Editór : Zezito Silva
