Malázia hakarak investe fábrika mina iha TL
DILI, 30 outubru 2023 (TATOLI) – Eis Ministru Agrikultura Malázia hanesan mós investór Datuk Junz Wong hasoru malu ho Prezidente Repúblika José Ramos Horta hodi ko’alia kona-ba Malázia nia kompromisu atu investe fábrika mina hosi (kelapa sawit) iha Timor-Leste.
“Ami ekipa ida hosi Malázia, ami mai ne’e privada atu haree situasaun iha Timor-Leste, ne’e mak ami ko’alia ho Prezidete Repúblika oinsa ba futuru ami hakarak loke fábrika mina iha Timor-Leste, maibé ami sei investe uluk oinsa kuda kelapa sawit atu bele prodús ba mina”, Datuk dehan ba jornalista sira iha Palásiu Prezidensiál, ohin.
Hasoru malu ida-ne’e, investór ne’e husu ba Prezidente Repúblika atu ko’alia ho Governu ho objetivu disponibiliza rai ba sira atu kuda kelapa sawit iha parte norte nian atu bele loke fábrika mina iha Timor-Leste hodi fó servisu ba timoroan sira.
“Kelapa sawit ne’e ita tenke kuda iha rai sira ne’ebé iha bee barak, hanesan parte norte nian bele tanba rai sempre bokon hela de’it, kelapa sawit ne’e bele moris iha ne’ebá, bainhira kelapa sawit ne’e moris iha ona fuan, ita foin bele loke fábrika, ida-ne’e ita sei fó servisu ba timoroan sira”, nia dehan.
Tuir nia, bainhira Governu Timor-Leste kolabora di’ak ho investor sira hodi la’o ba oin, mak iha futuru Timor-Leste lá presiza tan importa mina-haan hosi rai-liur.
Aleinde ne’e, investór hirak ne’e aprezenta mós projetu hamutuk 10 ba Prezidente Repúblika kona-ba dezenvolve agrikultura iha Timor-Leste.
“Timor-Leste potensiál tebes ba agrikultura, ita presiza dezenvolve atu redús importasaun ba ai-haan sira, entaun ami lori mós livru manúal ida iha livru laran iha projetu importante 10 ne’ebé ko’alia liu kona-ba investimentu ba agrikultura”, nia hatete.
Tanba ne’e, Horta apresia ho investór hirak ne’e tanba iha hanoin pozitivu hodi servisu hamutuk ho Timor-Leste hodi dezenvolve setór agríkola.
Nia sei ko’alia ho Ministériu Agrikultura hodi bele haree asuntu ne’e, tanba importante tebes ba Timor-Leste nia dezenvolvimentu iha setór agrikultura.
Jornalista: Hortencio Sanchez
Editór : Zezito Silva
