Top

PNTL halo apreensaun minarai litru 1.400 iha tasi Atabae

Portavós Komandu Jerál PNTL, Superintendente Polisia, António da Luz. Imajen /Tatoli

DILI, 30 outubru 2023 (TATOLI) ­- Portavós Komandu Jerál Polísia Nasionál Timor-Leste (PNTL), Superintendente Polísia, António da Luz, dehan Unidade Polísia Marítima (UPM) ne’ebé destaka iha área tasi Atabae, Postu Atabae, Munisípiu Bobonaro halo apreensaun ba minarai ho litru 1.400.

Apreensaun ne’e, membru UPM halo iha loron (29/10) foin lalais iha oras 14:00 bainhira iha grupu balun ho ró hatama minarai hamutuk jerigen 70 ho litru 1.400 litru via marítima.

Bainhira ekipa UPM ne’ebé hala’o funsaun iha área tasi ibun Beacou Atabae nian halo kedan intervensaun rápida hodi asegura kedan eveidénsia sira ne’e.

Maibé bainhira ekipa UPM tún hodi asegura suspeitu no evidénsia sira ne’e, suspeitu ne’ebé hanesan nain ne’ebé hatama minarai halai lakon tiha no PNTL la konsege asegura sira nain-rua.

“Sasan sira ne’ebé mak ita-nia UPM halo apreensaun iha Atabae ne’e kompostu hosi minarai jerigen litru 20 ne’e hamutuk 70 no totál minarai ne’ebé ita halo apreensaun hamutuk litru 1.400”,  António da Luz, hateten ba jornalista sira iha Komandu Jerál PNTL, segunda ne’e.

Luz dehan, evidénsia sira ne’e agora dadaun UPM asegura hela iha Postu Polísia Unidade Marítima Atabae.

“Supeitu sira ne’ebé nain ba evidénsia sira ne’e agora daudaun PNTL buka tuir hela hodi submete ba prosesu investigasaun”, nia adianta.

Aleinde ida-ne’e, Superintendente Polísia, António da Luz, informa tán katak iha domingu (29/10) horseik PNTL liuhosi Unidade Polísia Marítima halo tán apreensaun ba sigaru ilísitu ne’ebé sidadaun timoroan balun ho karreta rua transporta hosi fronteira mai Díli.

Ne’e mak sasan ilisitu sira hanesan sigarru no ‘fogo artefisiál’ ka ‘petasan’ ne’ebé komunidade balun hatama, Polísia Nasionál Timor-Leste (PNTL) prende hodi halo identifikasaun iha PNSIK, Dili, segunda (30 outubru 2023). Imajen Tatoli/António Daciparu

Maibé to’o iha  área Tibar Munisípiu Liquiça, membru UPM halo kedan apreensaun tanba deteta katak sidadaun sira ne’e halo infransaun hodi hatama sigaru ilísitu hosi fronteira mai Timor-Leste no livre hosi Autoridade Polísiál nia kontrolu iha fronteira.

Hafoin ekipa UPM halo tiha apreensaun ba sasan sira ne’e, ekipa UPM submete kedan ba parte Departementu Investigasaun Kriminál (DIK) Komandu Jerál atu halo prosesu identifikasaun  ba suspeitu sira inklui evidénsia sira ne’ebé UPM halo apreensaun.

Jornalista: Natalino Costa 

 Editór : Zezito Silva

Publisidade

Leave a Reply

Latest Post

error: Content is protected !!