DILI, 30 outubru 2023 (TATOLI) – Portavós Komandu Jerál Polísia Nasionál Timor-Leste (PNTL), Superintendente Polísia, António da Luz, dehan joven tenke kria pás no estabilidade durante selebrasaun finadu.
“Selebrasaun loron finadu ne’e, ita atu ba halo orasaun ba ita-nia matebian sira, tanba ne’e mak husu ba joven sira atu bele koopera atu bele kontribui ba pás no estabilidade iha idak-idak nia fatin, labele halo problema, durante loron bo’ot ida-ne’e”, António da Luz, hateten ba jornalista sira iha Komandu Jerál PNTL, segunda ne’e.
Nia alerta, kuandu joven sira koko halo problema iha loron bo’ot mak sei hasoru justisa tanba ne’e di’ak liu koopera.
“Ha’u-nia mensajen mak ne’e, ba joven sira ba han no hemu iha rate no vizita rate iha tempu finadu tuir kustume Timor-Leste nian tenke han ho responsablidade no hemu tua karik sente lanu di’ak liubá deskansa, labele kria problema iha rate, tanba iha rate ne’e ema barak mak ba halo orasaun. Kuandu ita ba kria fali problema iha ne’ebá mak polísia sei atua tuir tuir lei”, nia adianta.
Luz hateten, Komandu Jerál PNTL fó ona orientasaun ba Komandu Munisípiu sira atu asegura fatin sira ne’ebé mak risku ba krime.
“Komandu Jerál sei apoia membru balun hodi reforsa seguransa iha selebrasaun finadu, liuliu hanesan munisípiu sei koloka membru barak atu asegura selebrasaun finadu bele lao di’ak
Komandante ne’e hateten, PNTL mantein firme hodi fó seguransa másima hodi selebra finadu ne’ebé la’o ho di’ak.
Jornalista: Natalino Costa
Editór : Zezito Silva
