DILI, 30 outubru 2023 (TATOLI) - Portavós Komandu Jerál Polísia Nasionál Timor-Leste (PNTL), Superintendente Polísia, António da Luz, hateten iha ámbitu eleisaun orgaun suku iha territóriu Timor-Leste iha (28/10) foin lalais ne’e, PNTL la rejista kazu krime grave.
Nia dehan, hahú hosi prosesu realizasaun eleisaun orgaun suku to’o prosesu kontajen votu hatudu situasaun seguru no kontroladu iha sentru votasaun.
“Jeralmente, situasaun iha eventu eleisaun suku foin lalais ne’e to’o eleisaun remata hatudu buat hotu di’ak no laiha problema grave, maske mosu dezentendimentu iha aldeia balun, hanesan iha Baucau maibé membru sira iha terenu ne’ebá konsege hakalma situasaun, to’o agora situasaun kontroladu”, António da Luz, dehan ba jornalista sira iha Komandu Jerál PNTL, segunda ne’e.
“Iha informasaun katak iha konfrontu ki’ik mosu iha sentru votasaun tanba kauza hosi joven balun maibé problema ne’e la bo’ot liu no la perturba buat ruma tanba pesoál seguransa no autoridade iha fatin halo kedan intervensaun”, nia relata.
Nia dehan, membru PNTL hosi Komandu Jerál ne’ebé mak destakadu iha munisípiu sira, regrasa hotu no iha ona Dili, tanba prosesu eleisaun suku hotu ona no sei hein segunda volta ne’ebé sei akontese iha 13 novembru.
“Ita prontu nafatin fó apoiu seguransa ba eventu eleisaun suku nune’e eventu ne’e bele la’o di’ak”, nia informa.
Jornalista: Natalino Costa
Editór : Zezito Silva
