DILI, 06 outubru 2023 (TATOLI) – Komisaun Funsaun Públiku (KFP) lansa ezame promosaun ba Funsionáriu Públiku (FP) hodi hasa’e sira-nia kategoria hosi nivél B ba A.
“Ezame promosaun ne’e bazeia ba dekretu lei No.1 /20218, ida-ne’e nia objetivu mak atu rekoñese servisu Funsionáriu Públiku sira-nian atu fó oportunidade ba funsionáriu bele konkore hosi kategoria ne’ebé sira iha ba fali kategoria ne’ebé aas liu”, Comissária para assuntos Recrutamento e Promoção na Função Pública Carmeneza dos Santos Monteiro, dehan ba jornalista sira iha edifisiu KFP, Matadouro, ohin.
Ezame promosaun ne’e hanensan meiu ida ba FP sira atu haklean liután koñesimentu, kontinua progresa prestasaun servisu ba funsionamentu públiku nian.
“Totál funsionáriu ne’ebé ohin tuir ezame ne’e hamutuk 349, sira sei konkore ba vaga 36, funsionáriu hirak ne’ebé ohin mai kompete ne’e hosi territóriu nasionál maibé barak liu Dili’, nia hatete.
Matéria ne’ebé prepara ba ezame ne’e utiliza ho lian portugés no tetun ho maioria materia jerál kona-ba funsionamentu administrasaun públiku, lei sira ne’ebé FP no servisu ne’ebé kada loron funsionáriu sira hala’o.
Haree ba FP barak mak kompete iha ezame ne’e ho nune’e durasaun ezame hahú ohin 06-23 novembru tinan ida-ne’e iha edifisiu KFP Matadouro.
Jornalista: Hortencio Sanchez
Editór : Zezito Silva
