KRO aprova orsamentu TATOLI,I.P 2024 ho montante $653.026.00
DILI, 06 novembru 2023 (TATOLI) - Komisaun Revizaun Orsamentu (KRO) aprova ona orsamentu ba Agência Notisioza TATOLI,I.P ba tinan oin ho montante $653.026.00.
Tetu fiskál orsamentu ba TATOLI, I.P tinan 2024 ho montante $422,979.00, kompostu hosi saláriu no vensimentu hamutuk $308,026.00, proposta orsamentu adisionál, $185.000.00, nune’e totál orsamentu ne’ebé prevé iha item saláriu no vensimentu hamutuk $493.026.00.
Enkuantu proposta orsamentu ne’ebé prevé iha item bens servisu TATOLI nian ba tinan oin ho proposta insiál $114.953.00 no orsamentu ne’ebé aumenta hosi KRO ho montante $45.047.00 nune’e totál orsamentu ne’ebé iha item bens servisu ho totál $160.000.00.
Tanba ne’e, totál orsamentu TATOLI, I.P ba tinan 2024 ho montante $653.026.00.
Haree ba ida-ne’e, KRO konkorda hodi aprova pedidu orsamentu adisionál ba TATOLI nian, portantu totál orsamentu ne’ebé TATOLI, I.P ba tinan oin hamutuk $653.026.00.
Durante aprezentasaun tetu orsamentu TATOLI nian ba tinan oin, hetan apresiasaun direta hosi Xefe Governu, Xanana Gusmão.
Hafoin aprezentasaun orsamentu TATOLI, I.P, Prezidente TATOLI IP, Manuel Pinto, agradese ba Primeiru-Ministru Xanana Gusmão tanba ho vontade tomak prevé tán orsamentu montante 160.000 hodi reforsa TATOLI nian servisu ba tinan oin.
“Ami agradese ba Primeiru-Ministru, tanba osan adisionál ne’ebé mak ami aprezenta ho montante $185.000 bele aprova no ami mós agradese ba Primeiru-Ministru tanba ho vontade rasik prevé tán osan balun iha bens servisu, ida-ne’e ita agradese tebes ba vontade ne’ebé mak nain Primeiru-Ministru iha”, Manuel Pinto hateten ba jornalista TATOLI iha Ministériu Finansas, segunda ne’e.
Manuel Pinto hateten, ho montante orsamentu $653.026.00 ne’ebé TATOLI hetan ba tinan oin, aprova ona iha KRO no sufisiente ona ba TATOLI.
“Ba orsamentu ne’ebé mak TATOLI iha ba tinan oin, orsamentu ne’e sufisiente para TATOLI ezekuta iha tinan ida laran nian”, nia afirma.
Jornalista: Natalino Costa
Editór : Zezito Silva
