KRO aprova tetu orsamentu milaun $1.7 inklui orsamentu adisionál CAC
DILI, 06 novembru 2023 (TATOLI) - Diretór Investigasaun Komisaun Anti-Korrupsaun (CAC, sigla portugés), José Verdial, hateten Komisaun Revizaun Orsamentu (KOR) aprova tetu orsamentu ho milaun $1.7 inklui orsamentu adisionál CAC nian ho totál rihun $560.
“Iha tetu orsamentu ba 2024, ami hetan milaun $1.7 maibé orsamentu ne’e la sufisiente atu kobre atividade CAC iha tinan oin, tanba ne’e ohin ami husu tán orsamentu adisionál ho montante rihun $560, ami nia orsamentu hosi Komisaun Revizaun Orsamentu haree la iha problema no sira apoiu sem rezerva, nune’e ohin sira aprova ona ami nian orsamentu tetu milaun $1.7, inklui ami nia orsamentu adisionál rihun $560”, José Verdial hateten ba jornalista sira hafoin halo tiha aprezentasaun KRO iha Ministériu Finansas, segunda ne’e.
Nia dehan, orsamentu adsionál ho montante rihun $560 sei prevé ba hola ekipamentu servisu atu bele asegura di’ak servisu CAC nian ba deklarasaun rikusoin ne’ebé CAC halo ba kargu xefia iha insituisaun Governu.
Tanba lei Medida Prevensaun Kombate Korrupsaun (MPCC,sigla portugés), iha númeru 7/2020 ne’e fó kompeténsia CAC atu simu deklarasaun rikusoin hosi kargu xefia sira hothotu.
“Entaun ita presiza presiza ekipamentu Informasaun Teknolojia ( IT) nian sufisiente para bele asegura dadus sira ne’e, tanba ne’e ita presiza tán adisionál”, nia adianta.
Veridial salienta, orsamentu adisionál ne’e mós sei hola karreta operasionál tolu ba CAC. Tanba karreta ne’ebé CAC hola iha 2010, karreta sira ne’e kondsaun ladún di’ak ona,
“Ami presiza tán adisionál para depois atu hola tán karreta tolu atu suporta atividade operasionál nian”, nia konklui.
Jornalista: Natalino Costa
Editór : Zezito Silva
