DILI, 07 novembru 2023 (TATOLI) – Prezidente Repúblika, José Ramos Horta, jusu na joven sira atu kontribui ba dezenvolvimentu no evita konflitu iha rai-laran.
Prezidente Repúblika destaka papél importante ba joven hotu iha era transformasaun ida ne’e atu kontribui de’it ba dezenvolvimentu no hadook aan hosi konflitu.
“Juventude mak iha forsa atu hametin pás, la’o tuir lei sira no protesaun ba direitu no liberdade fundamentál sira liuliu sira ne’ebé vulneravél”, Mensajen Xefe Estadu Ramos Horta ne’ebé lee hosi Xefe Kaza Sivíl, Jesuína M. Ferreira Gomes, iha abertura ba semináriu nível nasionál ba foinsa’e sira ho tema ” Espíritu 12 Novembru Mai Ita Hapara Violénsia iha Timor-Leste”, ne’ebé realiza iha Palásiu Nobre Lahane, ohin.
“Loloos Prezidente Repúblika mak mai, iha eventu ida-ne’e, maibé tanba vizita Estadu ba Brunei Darusalam no Filipina, Prezidente delega ha’u mak mai atu lee hela Prezidente nia mensajen ba joven jerasaun rezisténsia iha fatin ida-ne’e, Prezidente husu ita tenke iha responsabilidade hodi lidera mudansa ba setór oioin iha sosiedade”, nia afirma.
Iha mensajen ne’e, Prezidente Repúblika sita katak loron nasionál juventude no komemorasaun aniversáriu Masakre Santa Cruz ba dala-32 hodi hanoin hikas sakrifisiu no korajen ne’ebé hatudu hosi joventude rezisténsia sira iha tempu pasadu ba luta libertasaun nasaun nian.
“Masakre Santa Kruz husik hela kanek iha ita-nia istória koletiva, maibé ne’e sai hanesan testamuña ida ba espíritu no luta naruk hodi hetan independénsia”, Horta hakuir.
Iha okaziaun ne’e, Ministru Juventude Desportu Arte no Kultura (MJDAK), Nélio Isaac Sarmento hatete, atividade hanesan ne’e importante tebes ba joven sira atu relembra hikas sofrimentu ne’ebé joven rezisténsia sira hahú iha 1991 Masakre Santa Kruz.
“Atividade ne’e importante tebes, atu hanoin hikas luta naruk ne’ebé ita-nia aman, maun sira nian iha tinan 30-resin ba kotuk, sira uluk halibur malu to’o ikus hetan duni nia finalidade ba ukun aan, hanesan mós agora ita-boot sira halibur malu iha ne’e atu alkansa ita-nia objetivu ba dezenvolvimentu nasaun nian ba oin”, Nélio dehan.
“Imi mak futuru nasaun nian, imi mak jerasaun kontinuadór, entaun tenke ense iha imi-nia kakutak ne’e ho buat ne’ebé mak pozitivu, husu ba imi atu labele sai fali jerasaun facebook ou media sosiál, ou jerasaun konflitu, tenke hakribi ona ba buat sira la di’ak hodi kuda buat di’ak iha imi-nia hanoin atu kontribui ba rai ne’e nia di’ak”, nia hakotu.
Jornalista: Hortencio Sanchez
Editór : Zezito Silva
