EDUKASAUN, HEADLINE

Inspetora-Jerál ME: Dirijente eskola ne’ebé falsifika dokumentu sei hetan sansaun

Inspetora-Jerál ME: Dirijente eskola ne’ebé falsifika dokumentu sei hetan sansaun

Emblema ME.

DILI, 08 novembru 2023 (TATOLI) – Inspesaun Jerál Ministériu Edukasaun (ME) sei halo investigasaun ba dirijente eskola balun ne’ebé deskonfia trata dokumentu falsu ba estudante sira no bainhira rezultadu hatudu komete irregularidade maka sei hetan sansaun.

Inspetora-Jerál, Maria Manuela Gusmão, informa katak investigasaun sei halo iha tempu badak tanba ministériu simu ona informasaun husi estudante na’in-10 ne’ebé iha diploma falsu hodi tama ba eskola sekundária.

Lembra katak ME indentifika alunu na’in-10 iha Dili hetan problema ho dokumentu eskola nian ka falsifika diploma no labele realiza ezame nasionál ne’ebé hala’o iha loron 16 to’o 18 outubru ne’e.

“Agora, ha’u seidauk bele hateten eskola ho dirijente nia naran tanba ida ne’e foin deskonfia. Bainhira iha prosesu investigasaun ne’e maka hatudu duni evidénsia envolvimentu dirijente eskola balun iha kazu ne’e sei iha sansaun ba sira, nune’e ba futuru labele halo tan”, inspetora dehan ba Tatoli iha Vila Verde, ohin.

Ba estudante na’in-10 ne’ebé la realiza ezame nasionál iha tinan ida ne’e, tuir dirijente,  balun mai hato’o ona sira-nian razaun katak diploma falsu ne’ebé sira hetan ne’e, tanba sira selu parte eskola mak halo.

“Sira selu dirijente eskola sira ba kada diploma $50 hodi estuda iha nivel sekundáriu. Ho problema ne’ebé maka identifikadu ne’e, estudante sira dehan sira la husu fali sira-nian osan, maibé eskola ne’ebé maka ajuda falsifika dokumentu ba sira hodi tama iha sekundáriu ne’e tenke prosesa”, subliña.

Diretór Eskola Sekundária Jerál 04 de Setembro Balide, Martinho Menezes, dehan iha estudante na’in rua maka tama iha kazu falsifikasaun dokumentu, tanba ne’e parte Inspesaun Jerál ministériu nian halo ona investigasaun atu hatene detalla problema ne’e.

“Ha’u kualkér minutu prontu nafatin atu kolabora ho ministériu hodi divulga informasaun ne’ebé ho loloos ba ekipa Inspesaun Jerál, tanba problema sira ne’e la’ós responsabilidade dirijente Eskola 04 de Setembro nian, maibé problema ne’e ho diploma ensinu báziku nian”, salienta.

Responsavel eskola ne’e apoia ME hodi buka tuir problema falsifikasaun diploma sira ne’ebé maka estudante na’in-10 hetan, nune’e labele akontese tan iha futuru, tanba husi kazu sira hanesan ne’e maka latau atensaun bele fó impaktu ba kualidade edukasaun iha país.

Rekorde katak Edukasaun Dili identifika alunu 137 laiha diploma no na’in-10 falsifika dokumentu, nune’e labele realiza ezame nasionál no iha Covalima na’in- rua.

Notísia relevante: Alunu 137 iha Dili la realiza ezame nasionál

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!