LFTL: Mushila dere Jerman 5-2
DILI, 13 novembru 2023 (TATOLI) – Ekipa primeira divizaun Liga Futsál Timor-Leste (LFTL), Mushila FC kontinua hatudu nia forsa hodi dere nia adversáriu Jerman FC ho rezultadu 5-2, iha jogu kontinuasaun ne’ebé hala’o iha kampu futsál Falintil-Forsa Defeza Timor-Leste (F-FDTL) Fatuhada, segunda kalan.
Iha kampu laran, ekipa rua lansa kontra no atake ba malu tuir tékniku no abilidade ekipa idaidak nian atu buka hatama golu liuhosi meiu oioin.
Jogu la’o durante menutu 13, jogadór João Paulo, susesu hodi marka golu dahuluk hodi muda rezultadu ba 1-0, hosi golu ne’e halo Mushila domina tebes kampu hodi la fó tempu ba nia ekipa adversáriu no iha menutu 24, jogadór Joaninho Fatima lansa golu daruak hodi muda rezultadu Mushila nian ba 2-0.
Golu ne’e halo Mushila loko aan makas iha kampu laran maske Jerman halo kontra atake ne’ebé makas no la rezulta golu.
Iha menutu 28 jogadór João Paulo marka golu terseiru muda rezultadu ba 3-0 halo Jerman hanoin la hetan no kontinua luta nafatin ho seriu maske adversáriu halo presaun ne’ebé makas.
Ho luta ne’ebé Jerman iha, la hela de’it hanesan luta tanba iha menutu 32 jogadór Rigoberto da Cunha susesu fura rede Mushila hatur rezultadu ba 1-3.
Nune’e iha menutu 34, jogadór Domingos de Carvalho halo golu segundu ba Jerman hodi muda rezultadu ba 2-3, hosi golu ne’e halo Mushila tenke esforsu makas atu aumenta golu, nune’e iha menutu 36 jogadór Natalizio Sang responde golu ida ba rede Jerman hatur rezultadu ba 4-2.
Hosi golu ne’e, aumenta tan Mushila nia forsa hodi hala’o jogu, nune’e iha menutu 38 jogadór Nilton Carvalho realiza golu ikus hodi save metin rezultadu ba 5-2.
Hosi rezultadu ne’e, lori Mushila iha direitu absoluta ba gaña pontu tolu iha jogu kontinuasaun ne’e no Jerman obrigadu hela ho derrota.
Jornalista: Hortencio Sanchez
Editór : Zezito Silva
