DILI, 14 novembru 2023 (TATOLI) – Primeiru Vise Konsellu Kombatente Libertasaun Nasionál (CCLN-sigla portugés), João Miranda “Aluc” ho ekipa hasoru malu ho Prezidente Repúblika José Ramos Horta hodi aprezenta serimónia ba loron Proklamasaun 28 Novembru, lista timoroan sira-nian kontribuisaun ba luta libertasaun nasionál iha diaspora no lista hosi konsellu atu husu Prezidente hodi atribui medalla ba sira ne’ebé luta ba libertasaun pátria.
“Ami aprezenta ideia prinsipál tolu liuliu serimónia loron Proklamasaun 28 Novembru, tanba iha komemorasaun ne’e sei kondekora ita-nia maluk ne’ebé fó sira-nia aan ba luta naruk Timor-Leste nian, ne’e ideia primeiru”, Aluc hateten ba jornalista sira iha Palásiu Prezidensiál, ohin.
Ideia selu mak CCLN lori mós lista timoroan sira ne’ebé durante kontrinu ba luta libertasaun iha diaspora atu hetan mós kondekorasaun hosi Estadu.
“Kona-ba ita-nia maluk sira fó kontribuisaun iha rai liur ne’e Prezidente Repúblika koñese sira hotu kedan, ida-ne’e mak ami lori sira-nia lista mai Prezidente atu haree, sé los ona bele fó kondekorasaun, sé balun Prezidente la aseita mós depende ba Prezidente, ne’ebé totál ema hira ne’e ami labele fó sai lai, Prezidente dehan fó tempu oras 48 ba nia atu haree no verifika”, nia dehan.
Nune’e mós, CCLN lori lista hosi konsellu nian hodi husu apoiu Prezidente Repúblika atu atribui medalla ba timoroan sira ne’ebé durante kontribui ba nasaun nia luta.
Tuir dadus ne’ebé iha, ema hamutuk 2000 mak sei simu kondekorasaun husi Estadu Timor-Leste iha 28 Novembru. Ida ne’e hanesan meiu ida hodi valoriza ba sira-nia luta ba Timor-Leste nia ukun rasik aan no kondekorasaun sei fahe iha Munisipiu hotu iha Timor-Leste.
Jornalista: Hortencio Sanchez
Editór : Zezito Silva
