TL sei prosede iha semana oin forúm ”business” internasionál
DILI, 14 novembru 2023 (TATOLI) – Vise Primeiru-Ministru no Ministru Koordenadór Asuntu Ekónomika no Ministru Turizmu Ambiente, Francisco Kalbuadi Lay, dehan Timor-Leste sei realiza iha semana oin forúm business internasionál ne’ebé sei partisipa hosi emprezáriu sira hosi nasaun hotu iha Azia.
“Ha’u rasik koordena hela atu organiza forúm business ba forúm internasionál ne’ebé sei partisipa hosi emprezáriu lubuk ida hosi rai hothotu iha Azia hanesan Xina, Korea, Pasífiku no seluk tan”, Kalbuadi hateten ba jornalista sira hafoin hasoru malu ho Prezidente Repúblika, Ramos Horta hodi informa kona-ba program aida-ne’e, iha Palásiu Prezidensiál, ohin.
Nia dehan, forúm business ne’e realiza tanba Ministeriu Koordenadór Asuntu Ekonómiku servisu hamutuk ho Kámara Komérsiu Indústria Timor-Leste (CCI-TL sigla portugés).
“Atividade ne’e ita sei hala’o iha salaun Grupo Media Nasionál (GMN) Bebora Dili, durante loron tolu, hahú iha 23-25 fulan ida-ne’e, asuntu importante ne’ebé sei ko’alia iha forúm ne’e mak ekonomia úniku asuntu, iha oportunidade ne’e ita-mós sei asina akordu servisu ho emprezáriu internasionál balun maibé ne’e forúm ne’e hotu mak sei haree”, nia relata.
Kalbuadi haktuir katak Prezidente Repúblika, José Ramos Horta apoia makas kona-ba atividade internasionál tanba meiu ida hodi hadia ekonomia rai-laran.
Koordenadór hosi programa ne’e mak Francisco Kalbuadi Lay ho nia vise mak Jorge Serano.
Jornalista: Hortencio Sanchez
Editór : Zezito Silva
