DILI, 15 novembru 2023 (TATOLI) – Prokurador Jerál Repúblika, Alfonso Lopes, informa Ministériu Públiku (MP), iha outubru, rejista kazu hamutuk 635.
“Durante fulan outubru, ita rejista kazu hamutuk 635, kazu entrada ne’e nivél nasionál no maioria asalta malu ofensa integridade fízika, balun abuzu sexual menór, balun violasaun sexuál no balun omisídu”, Alfonso subliña ba jornalista sira iha Palásiu Prezidensiál, ohin.
Hosi kazu hirak ne’e, Prokuradór sira konklui ona prosesu ba kazu hamutuk 395, arkiva 205, akuza hodi submete ba Tribunál hamutuk 190.
Enkuantu hosi tinan sira kotuk, too ohin loron, kazu pendente iha MP hamutuk 3,255.
“Númeru kazu ne’ebé pendente sae boot tanba agora daudauk kódigu prosesu penál foun, entaun ita-nia Prokuradór sira atu uza artigu sira iha kódigu prosesu penál maibé artigu barak mak altera entaun sira tenke presiza tuir formasaun, hothotu tuir formasaun, advogadu, defensoria atu nune’e bele hatene oinsa uza kódigu prosesu penál ida foun ne’e”, nia relata.
Prokuradór hosi MP fahe ba grupu primeiru no segundu ba tuir formasaun iha Lisboa Portugal ho nune’e mak kauza ba aumenta kazu pendente hosi tinan kotuk to’o mai ohin loron.
Jornalista: Hortencio Sanchez
Editór : Zezito Silva
