DILI, 17 novembru 2023 (TATOLI)–Eleisaun suku segunda ronda ne’ebé realiza iha 13 novembru ne’e hatudu iha rezultadu kontajen no apuramentu suku, iha suku Molop, munisípiu Bobonaro nian ne’e rezulta kandidatu xefe sukua na’in-rua rezultadu empata ho votu 337.
Ba kestaun ne’e, Diretór Jerál Sekretáriadu Téknika Administrasaun Eleitorál (STAE), Acilino Manuel Branco, hateten prezidente meza no meza asembleia mak iha autoridade hodi realiza hikas eleisaun terseira volta hodi bele hetan xefe suku eleitu.
Notísia Relevante: Rezultadu Eleisaun Suku volta daruak iha Molop empata
“Rezultadu eleisaun segunda ronda empata ne’e, fila-fali ba konsellu suku nian ho autoridade sira hodi halo konkordánsia ruma, nune’e bele realiza fali eleisaun iha tempu badak tanba iha 24 novembru ne’e enkontru dahuluk hodi lia-na’in no juventude sira-nian,” Diretór Jerál STAE, Acilino Manuel Branco, hateten ba Agência Tatoli, iha nia kna’ar fatin Caicoli, sesta ne’e.
Molok tama iha 24 novembru ne’e, tenke iha ona xefe suku eleitu nune’e iha 28 novembru bele simu pose.
Peolema ida-ne’e la’ós akontese de’it kandidatura xefe suku nian maibé sei iha aldeia balun iha munisípiu Covalima, Manufahi no ida iha Lautém mós seidauk iha xefe aldeia eleitu.
“Ita mós antes ne’e iha aldeia hitu ne’ebé seidauk hetan xefe aldeia eleitum maibé foin lalais asembleia meza realiza eleisaun iha Eremra, Oé-Cusse, Viqueque no iha ona xefe aldeia eleitu. Ita falta de’it mak aldeia ida iha Covalima, Manufahi no ida iha Lautém. Ida-ne’e iha ona konkordansia no iha tempu badak realiza eleisaun,” nia dehan.
Sorin seluk, Diretór Jerál Ministériu Administrasaun Estatál (MAE), António Augosto Guterres, dehan kona-ba empata ne’e buka tempu bele realiza fali eleisaun.
“Kuandu treseira faze empatadu iha, mak prezidente meza suku deside hamutuk ho meza asembleia suku, nune’e realiza hikas molok tama iha 24 novembru ne’e,” ia hateten.
Jornalista : Osória Marques
Editór : Cancio Ximenes
