DILI, 19 novembru 2023 (TATOLI) – Primeiru-Ministru, Kay Rala Xanana Gusmão, agradese no kongratula ba inisiativa Organizasaun Intergovermentál g7⁺ iha Portugál ne’ebé kontinua realiza jogu futsal Peace Cup Juventude Nasaun g7+ 2023, hodi promove nafatin pás.
PM Xanana husu ba timoroan sira hodi promove pás liuhosi atividade desportu ho objetivu atu bele promove Timor-Leste nia amajen ba mundu.
“Ha’u dezeja susesu ba imi hotu iha torneiu Peace Cup 2023, promove pás, tanba jogu futeból bele hametin ita-nia unidade”, Xanana liuhosi komunikadu ne’ebé Agência TATOLI asesu, ohin.
Xanana agradese ba ekipa organizadór sira ne’ebé servisu ho vontade, domin no responsabilidade hodi organiza jogu ne’e la’o susesu, konta ho apoiu husi Padre Salesianu sira iha Évora ne’ebé disponibiliza sira-nia fatin hodi hala’o jogu ne’e.
Xefe Governu, apresia tebes ba partisipasaun estudante timoroan sira iha Portugál hodi hametin sira-nia unidade ho juventude nasaun membru g7⁺ iha Portugál hodi hala’o jogu ne’e.
Torneiu Peace Cup 2023 patrosinadu husi Organizasaun Intergovernamentál g7⁺
hala’o parseiria ho Embaixada Timor-Leste iha Lisboa no Associação dos Estudantes Timorenses (ASET) iha Évora.
Eventu ne’e, Embaixadora Timor-Leste ba Portugál, Isabel Guterres, iha loron sábadu (18/11/23) iha kampu futsal Sidade Évora Portugál hodi selebra loron Nasional Juventude Timor-Leste nian.
Torneiu Anuál Peace Cup ne’e hala’o ona lansamentu iha tinan 2021, husi Pessoa Eminente Organizasaun Intergovernamentál g7+, Kay Rala Xanana Gusmão, hodi promove pás no vida saudável ba juventude sira.
Torneiu Peace Cup tinan ne’e ho tema “Desportu ba Dame no Dezenvolvolvimentu” partisipa hosi estudante no trabalhadór timoroan lubuk ida ne’ebé servisu iha sidade Évora.
Iha fatin hanesan, Sekretáriu Jerál g7+, Helder da Costa, espera torneiu ne’e realiza ho di’ak, ho profisionalizmu, fair-play no respeitu hodi fortalese di’ak liután relasaun entre estudante sira no komunidade Estadu membru nian iha Portugál.
Organizasaun g7⁺ sei kolabora nafatin ho estudante no asosiasaun sira ne’ebé hakarak organiza eventu ne’e iha tinan oin mai.
Jogu ba tinan ne’e partisipa hosi ekipa hamutuk 10, kompostu husi estudante no komunidade timoroan no reprezentante husi Komunidade Estadu Membru g7⁺, iha Portugál hanesan Guiné-Bissau no São Tomé e Príncipe.
Jornalista: Hortencio Sanchez
Editór : Zezito Silva
