DILI, 20 novembru 2023 (TATOLI) – Atleta Olimpíku no Paralímpíku hasoru malu ho Prezidente Repúblika José Ramos Horta hodi ko’alia kona-ba kondisaun atleta sira nian.
“Ami hamutuk ho atleta sira Olímpiku no Paralimpíku sira ne’ebé durante ne’e ba tuir ona jogu olimpíku no para límpiku iha Austrália, Rio de Janeiru Brazíl, Bejin Xina no Tokyo foin lalais ne’e, objetivu lolos mak oinsa atu haree kona-ba atleta seniór sira ne’ebé mak reforma ona hosi sira-nia vida atleta maibé laiha mudansa ruma ba hadia sira nia moris, entaun mak ami mai ko’alia ho Prezidente Repúblika atu haree ba oin ne’e oinsa”, Vise Prezidente Komite Olimpíku Nasionál Timor-Leste (CONTL-sigla portugés), Mateus da Cruz dehan ba jornalista sira iha Palásiu Prezidensiál, ohin.
Estrutura CONTL hamutuk ho atleta olimpíku sira husu ba Xefe Estadu atu bele tau atensaun mós ba atleta ne’ebé kareira remata hodi fó valorizasaun liu hosi meiu saida de’it tanba durante jogu internasionál reprezenta nasaun nia naran la’os individu.
“Ita husu ba Prezidente Repúblika atu tau matan mós ba atleta prestasaun sira bainhira reforma hosi sira nia kareira nuudar atleta, tanba atleta barak mak remata sira nia kareira to’o agora la hetan servisu no laiha rendimentu ruma ba sira nia moris, tanba ita hatene atleta prestasaun sira ba ne’e la’os reprezenta individu maibé nasaun, tenke tau importánsia ba sira”, nia konklui.
Jornalista: Hortencio Sanchez
Editór : Zezito Silva
