DILI, 20 novembru 2023 (TATOLI) – Ministériu Saúde (MS) halo lansamentu ba kampaña integradu ba promosaun no edukasaun saúde hanesan nutrisaun, saúde inan no oan, prevensaun moras dengue, tuberkuloze, moras la-hada’et no asidente tráfegu inklui vasinasaun covid-19 iha Aldeia Laloran, Suku Bairo Pite, Postu Administrativu Dom Aleixo, Munisípiu Dili.
“Ohin ita halo lansmaentu ne’e kona-ba atividade ne’ebé mak hola parte iha programa integradu saúde hanesan nutrisaun, saúde inan no oan, prevensaun moras dengue, tuberkuloze, moras la-hada’et no asidente tráfegu inklui vasinasaun covid-19, entaun ita hakarak hothotu hamutuk no labele halo ketak no tenke integradu atu profisionál saúde sira tenke tun ba aldeia ka suku hodi halo tratamentu ba populasaun sira ne’ebé moras”, Vise Minsitru Fortalesimentu Instituisionál Saúde, José dos Reis Magno, dehan ohin.
Nia hateten, atividade ida-ne’e la’os iha Munisípiu Dili de’it, maibé ba munisípiu hotu iha territóriu nasionál, espera katak ho prezensa médiku espesialista sira nian iha área remota sira hodi bele fó atensaun di’ak ba populsaun sira.
“Nonu Governu Konstituisionál fó hela prioridade ba programa ida-ne’e atu bele la’o ba oin, entaun ohin ita mós hetan oportunidade hodi hetan apoiu médiku espesialista sira husi Singapura liuhosi konvisaun relijizu, protestante sira, espera katak atividade ida-ne’e la’o ho di’ak tanba ita -nia atividade ne’e ko’alia kona-ba promosaun edukasaun saúde entaun ita presiza tempu oinsá ita bele konvense ita-nia komunidade sira atu bele prevene ba moras sira hotu”, nia relata.
Iha fatin hanesan, Komunidade Kristão Agape, Pastor Nilton Lima, hateten atividade lansamentu ida-ne’e iha igreja kristão agape, importante tebes atu fó hanoin ba komuniddae sira atu prevene husi moras hotu.
“Ami sente priviléjiu tanba ami kontatu médiku espesialista husi igreja Singapura, entaun médiku sira ne’ebé agora daudaun iha ne’e na’in hitu hodi servi ita-nia komunidade sira iha ne’e”, Nilton Lima afirma.
Nia esplika, médiku espesialista na’in hitu ne’e daudaun iha hela Igreja Agape, maibé ho objetivu katak atu tulun komunidade no ema hotu tenke simu konsulta liuhosi atendimentu ida-ne’e.
“Ekipa sira ne’e husi área oioin hanesan dentista, sirurjiaun, klíniku jerál, entaun sira atu mai hodi fó asisténsia ba populasaun sira iha Timor-Leste tanba haree katak moras sira ne’ebé mak eziste aas iha Timor-Leste mak hanesan tuberkoloze dengue no moras sira seluk tan.
Jornalista : Felicidade Ximenes
Editór : Zezito Silva
