DILI, 22 novembru 2023 (TATOLI) – Estadu Unidu Amérika (EUA) iha Timor-Leste tau ona fundu hamutuk millaun $7,5 hodi disponibiliza formasaun ba joven sira liuhusi programa “Feto no Joven Kria Ita Nia Futuru” hodi kompete iha merkadu traballu nasionál no internasionál.
Orsamentu ne’e rasik fó liu husi Ajénsia Estadu Unidu Amérika ba Dezenvolvimentu Internasionál (USAID) no sei serbisu hamutuk ho Institute of Business (IOB) ho NCBA CLUSA liuhusi kriasaun sentru ba Dezenvolvimentu Foinsa’e iha munisípiu Dili, Bobonaro no Baucau. Atu nune’e durante tinan lima nia laran fundus ne’ebé EUA apoia ne’e bele prodús jerasaun foun hamutuk rihun 22 ho formasaun ne’ebe adekuada.
Programa “Feto no Joven Kria Ita Nia Futuru” ne’e, Enkarregadu Negósiu Embaixada EUA, Marc Weinstock, ho Sekretáriu Estadu Formasaun Profisionál no Empregu (SEFOPE), Rogério Mendonça, lansa ona, ohin, atividade refere ho intensaun atu apoia joven sira feto no mane inklui ema ho defisiénsia sira hodi bele hetan kompeténsia prátika ne’ebé iha relevante ho merkadu traballu atu fó biban hodi hetan serbisu, iha envolvimentu empreendedorizmu no kontribui ba prosperiedade nasaun ne’e nian.
Programa ne’e husi 2023 to’o 2027. Atividade ne’e rasik sei loke ba grupu hotu, maibé liuhusi establesimentu sentru ba Dezenvolvimentu Foinsa’e ne’ebé sei instala iha minisípiu sira.
“Bainhira sentru ne’e kria ona sei oferese oportunidade ba dezenvolvimentu kompeténsia joven timoroan sira-nian atu sai ema ne’ebe iha kriatividade uitoan atubele kompete iha merkadu traballu no bele prepara aan sai mós emprezáriu ho kualidade”, Marc Weinstock hatete iha lansamentu programa refere ne’ebé halao iha kampus IOB, Pantai Kelapa, ohin.
Fundu ne’ebé Governu Amérika oferese ne’e liuhusi USAID ho Kooperasaun IOB no SEFOPE nune’e bele kria futuru ida di’ak ba joven timoroan sira liuhusi atividade formasaun hosi hasa’e sira-nian abilidade no kapasidade.
Tuir enkarregadu, ho kriasaun sentru ne’e rasik lori orgullu boot ida ba EUA, tanba husi sentru ne’ebé harii uluk ona iha Díli bele loke ona oportunidade ba joves sira atubele hola parte ona iha formasaun ne’e.
Iha fatin hanesan, Sekretáriu Estadu Formasaun Profisionál no Empregu, Rogério Mendonça, hatete lansamentu ba programa ne’e nu’udar pasu importante atubele kapasita jerasaun foun sira, tanba formasaun sira ne’e maka atu hakbiit koñesimentu ba ema ida-idak molok atu hakatak bá buka serbisu iha nivel nasional no internasionál.
“SEFOPE hanesan departamentu Estadu ne’ebé iha responsabilidade boot atu hasa’e kualidade, maibé bainhira atu loke sentru sira ba formasaun tenke hetan mós rekoñesimentu husi SEFOPE’’, afirma.
Sentru formasaun ne’ebé loke ona ida Dili ne’e sei oferese oportunidade ba joven dezempregadu sira, liuliu ba feto sira atubele halo mudansa ba sira-nian moris liuhusi husi serbisu sira ne’ebe sira sei tama ba.
Reitór IOB, Pedro Ximenes, salienta katak sentru formasaun sei apoia mos manuál espesífika sira maka hanesan formasaun iha área teknolojia informasaun no komunikasaun (TIK), otelaria, akuntabilidade, jestaun administrasaun, dezeñu gráfiku, jestaun negósiu, formasaun elektrónika, karpintaria, formasaun lian ingleza no portugeza. Formasaun sira ne’e responsabiliza husi IOB rasik.
Kursu ne’e sei hala’o ho sistema rua diferente mak foku ba formasaun empreendedorizmu no seluk kona-ba formasaun karáter joven sira-nian oinsá maka enkaixa aan iha merkadu traballu iha futuru.
“Iha Dili formasaun hahú ona husi kedan setembru. Formandu ne’ebé maka hetan ona oportunidade tuir formasaun iha sentru ne’ebé IOB estabelese ne’e hamutuk 280”, adianta.
Notísia relevante: EUA kompromete dezenvolve komponente Aero Timor-Leste
Jornalista: Tomé Amado
Editora: Maria Auxiliadora
