Top

Posibilidade atendimentu passaporte liuhosi sistema online sei akontese iha 2025

Nee mak kondisaun atual komunidade sira antrian iha ministriu justisa hafoin reativa no loke fali ba publiku hodi trata pasaporte, kuarta 22 novembru 2023.Foto Tatoli/Antonio Daciparu

DILI, 22 novembru 2023 (TATOLI) – Diretór Jerál Servisu Rejistu Notariadu, João Fernando, dehan Planu Asaun Anuál hosi Diresaun Jerál Servisu Rejistu Notariadu aposta ona, atu 2024, sistema atendimentu passaporte ba públiku liuhosi online, maibé orsamentu ne’ebé prevé sei labele kobre iha tinan oin.

“Tuir Planu Asaun Anuál 2024, hosi Diresaun Jerál Servisu Rejistu Notariadu katak prevé millaun $4 hodi aposta ba ida-ne’e katak tinan oin servisu atedimentu públiku iha notariadu ho sistema dijitál maibé realidade osan ne’ebé prevé mai iha notariadu millaun $2, ida-ne’e la sufisiente atu alkansa metas ida-ne’e”, João Fernado dehan ba jornalista sira iha nia kna’ar fatin Colmera, kuarta ne’e.

Fernando rekoñese katak atendimentu Passaporte no Billete Identidade no Sertidaun Moris ne’ebé hala’o iha notariadu sei la’o ladún másimu tanba prosesu atendimentu sei uza manuál.

Nia salienta katak osan ne’ebé diresaun aposta ne’e atu nesesita ba vida institusionál de’it maibé labele atu dezenvolve no atinje metas ho razaun orsamentu ne’ebé la sufisiente.

“Ita rekoñose ida-ne’e, ita labele halo buat ida, maibé saida mak ita iha, ami kontinua fó atendimentu ba povu liuhosi saida mak ami iha”, nia revela.

Diretór rekoñese mós katak sistema atendimentu iha Diresaun Jerál Servisu Rejistu Notariadu iha atendimentu passaporte ba públiku seidauk la’o ho di’ak tanba ne’e sei iha problema.

“Ita-nia pasaporte 16.000 foin daudaun empreza fornesedór Thales entrega ona mai ita. No ita fó ona avizu katak iha loron 22 novembru hahú ona ita nian atedimentu passaporte ba ita nian públiku sira no iha loron ida-nia laran ita só halo atedimentu ba ema hamutuk 140”, nia rekorda.

Tanba ne’e, Diresaun Jerál Servisu Rejistu Notariadu hahú halo atendimentu ba Passaporte tuir avizu ne’ebé fó sai no funsionaáriu DJSRN hahú halo ona atendimentu.

“Hafoin ita-nia atendimentu ba passaporte paradu durante fulan ualu nia laran. Ohin ita hahú halo fila fali atedimentu ba passaporte ba ita-nia ema sira ne’ebé atu mai halo sira-nia passaporte, maibé realidade ita-nia ema sira mai barak la tuir númeru ne’ebé ita fó sai ona”, nia adianta.

Nia dehn, komunidade balun ne’ebé atu atende sira nia pasaporte mai desde tuku 4:00 madrugada, balun mós mai tuku 6:00 no iha balun mós haksoit moru atu buka forma iha oin atu hetan atendimentu lalais.

“Ha’u hanoin situasaun sira ne’e mosu tanba kauza hakarak hetan lalais passaporte no situasaun sira ne’e, mosu normál tanba ita hatene katak passaporte durante ne’e paradu fulan ualu, entaun ema barak mak hakarak atu hetan passaporte”, nia informa.

“Entaun situasaun ida agora ka ohin loron akontese iha aredór hanesan ohin ita bo’ot sira haree ema sena malu, buat sira ne’e mosu tanba situasaun no situasaun sira ne’e normál, ita labele sees hosi ne’e, tanba mai hosi asaun ema nia”, Fernado afirma.

“Ita haree avizu ne’e klaru ona maibé tanba ema nia aktu sira, ita labele bandu, maibé ha’u husu de’it ba komunidade katak favór kumpre regra sira atu ita labele halo buat ida ne’ebé ema fó presepsaun ladi’ak ba prosesu atendimentu públiku”, nia dehan.

Fernado esplika, tuir lei traballu katak ema funsionáriu sira halo servisu loron ida iha oras ualu nia laran. Tanba komunidade sira tenke halo tuir ida-ne’e atu labele prejudika fali servisu atendimentu públiku.

“Sistema atendimentu ba passaporte ne’e loron ida simu 140, labele liu, sé liu kapasidade sistema ka ita obriga halo liu kapasidade sistema mak sistema atedimentu passaporte bele avaria, kuandu akontese nune’e, ita sei hetan problema bo’ot fila fali”, nia konklui.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!