Vise-MS hasoru malu ho Company Merkanti Holding pLc Xina
DILI, 22 novembru 2023 (TATOLI) – Vise-Ministru ba Operasionalizasaun Ospitál (VMOH), Flávio Brandão Mendes de Araújo, hala’o sorumutu ho delegasaun Company Merkanti Holding pLc hosi Xína, ho intensaun atu rona planu Ministériu Saúde (MS) nian bainhira posibilidade halo investimentu.
“Sorumutu ne’e fasilita husi Embaixada Timor-Leste iha Xína liuhosi Ministériu Negósiu Estranjeiru no Kooperasaun (MNEK) ne’ebé mak mai atu rona planu Ministériu Saúde nian no hakarak atu kolabora ho setór saúde tanba sira mós iha programa atu investe iha nasaun ida-ne’e”, hatete liuhosi komunikadu ne’ebé Agência TATOLI asesu hosi media MS, ohin.
Iha biban ne’e, Mendes mós hato’o asuntu importante tolu ne’ebé sai hanesan programa prioridade ba Governu nian, mak estabelesimentu sentru kardiolojia no sentru kankru no Tumor no mós sentru paliativu no suportivu iha nasaun ida-ne’e.
Iha okaziaun ne’e, Vise-Ministru Saúde hato’o mós preokupasaun sira iha área rekursu umanu, ekipamentu no instrumentu ne’ebe kualifikadu.
Kompañia refere mós aseita ho preokupasaun sira ne’e tanba dalabarak pasiente barak mak tenke halo tratamentu iha rai-liur.
Jornalista: Hortencio Sanchez
Editór : Zezito Silva
